'n Familie se hart vir die natuur inspireer reservaat

"Ons kon nie net toekyk en stilbly terwyl die verwoesting onder almal se neuse plaasvind nie.

- Alida de Beer

Ons móés iets doen.Die familie wat 300 hektaar grond rondom Voëlklip by Heroldsbaai gekoop het om dit in 'n natuurreservaat te omskep, se eerlike en uitsluitlike visie is die rehabilitasie en bewaring van die gebied vir toekomstige geslagte.

George Herald het onlangs berig dat Fynbos Eiendomme, 'n maatskappy van 'n Stellenbosse familie, die grond bekom het vir hierdie doel. Jan Vreken, die familie se spreekbuis en uitvoerende hoof van die maatskappy, het geantwoord op mense wat skepties staan teenoor die aankondiging.

Hy sê die familie het diep wortels in die Tuinroete. Hulle het in die laat tagtigs begin om hul vakansies in Heroldsbaai deur te bring.

"Soos baie mense wat grootgeword het met vakansies in Heroldsbaai, het ons geslagte se herinneringe wat aan hierdie kuslyn gekoppel is - om in die heuwels rond te klouter, die fynbos te verken en lang somervakansies hier deur te bring. Daardie verbintenis is waar ons liefde vir die natuur vandaan kom."