மறுசீரமைப்பால் இழக்கப்போகும் மக்களவைத் தொகுதிகள் எத்தனை?

புள்ளிவிவரங்களுடன் துணை முதல்வர் உதயநிதி ஸ்டாலின் விளக்கம்

- 

சென்னை, மார்ச் 22: மத்திய அரசின் திட்டப்படி மேற்கொள்ளப்படும் மறுசீரமைப்பால் தமிழ்நாடு உள்பட தென்மாநிலங்கள் இழக்கப் போகும் தொகுதிகளின் எண்ணிக்கை விவரங்களை துணை முதல்வர் உதயநிதி ஸ்டாலின் விளக்கினார்.

தொகுதி மறுசீரமைப்பு தொடர்பாக சென்னையில் சனிக்கிழமை நடைபெற்ற கூட்டு நடவடிக்கைக் குழுக் கூட்டத்தில் காட்சிப் படவிளக்கங்களுடன் துணை முதல்வர் உதயநிதி ஸ்டாலின் பேசியது: இந்திய அரசமைப்புச் சட்டப்பிரிவு 82-இன்படி, மக்கள்தொகை கணக்கெடுப்புக்குப் பிறகு மக்களவைத் தொகுதிகள் வரையறை செய்யப்பட வேண்டும். அதன்படி, 1951-ஆம் ஆண்டு மக்கள்தொகை கணக்கின்படி இந்தியாவில் மக்களவைத் தொகுதிகளின் எண்ணிக்கை 489-லிருந்து 494-ஆக அதிகரிக்கப்பட்டது. அதன்பிறகு, 1961-ஆம் ஆண்டு மக்கள்தொகை கணக்கெடுப்பின்படி, தொகுதிகளின் எண்ணிக்கை 522-ஆக உயர்ந்தது. தொகுதி மறுசீரமைப்பானது கடைசியாக 1971-ஆம் ஆண்டு மக்கள்தொகை கணக்கெடுப்பின்படி 1973-இல் மேற்கொள்ளப்பட்டது. அப்போது, இந்தியாவில் மொத்த மக்களவைத் தொகுதிகளின் எண்ணிக்கை 543-ஆக இருந்தது. அந்த எண்ணிக்கை இப்போது வரை தொடர்கிறது.