போதைப் பொருள் வழக்கு: நடிகர் ஸ்ரீகாந்த் கைது

சென்னையில் போதைப் பொருள் வழக்கில் நடிகர் ஸ்ரீகாந்த் திங்கள்கிழமை கைது செய்யப்பட்டார்.

- 

சென்னை, ஜூன் 23:

சென்னை நுங்கம்பாக்கத்தில் உள்ள ஒரு மதுபானக் கூடத்தில் அடிதடியில் ஈடுபட்டதாக அதிமுக தகவல் தொழில்நுட்ப அணி முன்னாள் நிர்வாகி தி.பிரசாத் உள்ளிட்ட பலர் கடந்த மாதம் 29-ஆம் தேதி கைது செய்யப்பட்டனர். இதன் பின்னர் அரசு வேலை வாங்கித் தருவதாக மோசடி செய்ததாகவும் பிரசாத் மீது மற்றொரு வழக்குப் பதிவு செய்யப்பட்டது. இவரை போலீஸார் தங்களது காவலில் எடுத்து விசாரித்து வந்தனர்.

விசாரணையில் பிரசாத்துக்கு கொகைன் போதைப் பொருள் பழக்கம் இருப்பதும், நுங்கம்பாக்கத்தில் உள்ள ஒரு தனியார் மதுபான விடுதியில் அவருக்கு சேலம் மாவட்டம் சங்ககிரி பகுதியைச் சேர்ந்த பிரதீப்குமார் என்ற பிரடோ என்பவர் கொகைன் போதைப் பொருளை விற்றதும் தெரியவந்தது.

இதையடுத்து, சென்னை காவல் துறையின் போதைப் பொருள் தடுப்பு நுண்ணறிவுப் பிரிவு போலீஸாரும், நுங்கம்பாக்கம் போலீஸாரும் பிரதீப்குமார் குறித்து விசாரித்து வந்தனர். இந்நிலையில், பிரதீப்குமாரையும், சர்வதேச போதைப் பொருள்கடத்தல் கும்பலைச் சேர்ந்த மேற்கு ஆப்பிரிக்காவின் கானா நாட்டைச் சேர்ந்த ஜான் ஆகியோர் கடந்த 19-ஆம் தேதி நுங்கம்பாக்கம் வானிலை ஆராய்ச்சி மையம் அருகே வைத்து கைது செய்யப்பட்டனர்.