சிக்கல் தீர்க்கும் சிரகிரி வேலவன்!

சிரகிரி, சிகரகிரி, மகுடகிரி, புட்பகிரி, சென்னியங்கிரி எனப் பல்வேறு பெயர்களாலும் அழைக்கப்படும் திருத்தலம் சென்னிமலை அருள்மிகு சுப்பிரமணிய சுவாமி திருக்கோயில்.

- -பொ. ஜெயச்சந்திரன்

சென்னிமலை என்றால் தலைமையான மலை என்று பொருள்படும்.சென்னிமலையின் அடிவாரத்தில் எட்டுத் திசைகளிலும், பல்வேறு கோயில்கள் அமைந்துள்ளன. மலையின் தென்புறம் செவ்வந்திசுவரர், கன்னி மூலையில் இந்திர விநாயகர், சிவன் கோயிலுக்கு மேற்கில் பெருமாள் கோயில், வடமேற்கில் நர்த்தன விநாயகர், துர்க்கையம்மன் கோயில், ஈசான திசையில் காமாட்சியம்மன் கோயில், அக்னி மூலையில் மாரியம்மன் கோயில், தெற்கே செங்கழுநீர்ப் பிள்ளையார் கோயில் ஆகிய கோயில்களுக்கு நடுநாயகமாக கைலாசநாதர் கோயில் அமைந்துள்ளது.

கோயிலின் வரலாறு புராணத்துடன் சம்பந்தப்பட்டது. ஆதிசேஷனுக்கும், வாயுதேவனுக்கும் பலப்பரீட்சை நிகழ்ந்தபோது, மேரு மலையை அனந்தன் சுற்றிக்கொண்டு கெட்டியாகப் பிடித்துக்கொள்ள, வாயுதேவன் புயல் போலக் காற்றை கடுமையாக வீசி, அவனது பிடியிலிருந்து மலையை விடுவிக்க முயன்றார். அப்போது மேருவின் சிகரப் பகுதி முறிந்து, பூவுலகில் பூந்துறை நாட்டில் விழுந்தது. அதுவே 'சிரகிரி' என்று அழைக்கப்படுகிறது.

நொய்யலாற்றின் கரையில், சென்னிமலைக்கு அருகாமையில் கொடுமணல் எனும் கிராமம் உள்ளது. மிகவும் தொன்மையான ஊர். பண்ணையாரின் பசுக்களில் ஒன்று ஓரிடத்தில் தானே வலியச் சென்று பாலைச் சொரிவது கண்டு அதிசயத்து, அந்த இடத்தைத் தோண்டச் செய்தார். அப்போது அவருக்குக் கிடைத்தது, அதிசயக்கத்தக்க முருகப்பெருமான் திருமேனி.