மாநிலங்களின் நிதிச் சுமைக்கு மத்திய அரசே காரணம்

மாநிலங்களுக்கு நிதிச் சுமையும், அழுத்தமும் ஏற்படுவதற்கு மத்திய அரசே காரணம் தமிழக நிதியமைச்சர் தங்கம் தென்னரசு குற்றஞ்சாட்டினார்.

- 

சென்னை, ஆக. 23:

மத்திய, மாநில அரசுகளுக்கு இடையிலான உறவுகள் குறித்து சென்னையில் சனிக்கிழமை நடைபெற்ற தேசிய கருத்தரங்கின் நிறைவு நிகழ்வில் அமைச்சர் தங்கம் தென்னரசு பேசியதாவது:

ஐரோப்பிய ஒன்றியம் அமைக்கப்பட்டு, 32 ஆண்டுகளே ஆகியுள்ள நிலையில், அவை தங்களுக்குள் ஏற்படும் பிரச்னைகள், முரண்களை பேச்சு மூலம் தீர்த்துக் கொள்கின்றன. ஆனால், 1950-ஆம் ஆண்டிலேயே அரசியல் சட்டத்தை உருவாக்கி, இந்தியா ஒன்றியமாக வளர்ந்து விட்ட போதும், இன்றுவரை நமக்குள் இருக்கக் கூடிய கலாசார மாற்றங்கள், அரசியல் சூழல் முரண்கள், ஏற்றத்தாழ்வுகளைத் தொடர்ந்து விவாதிக்க நாம் தயாராக இல்லை.

மத்திய, மாநில அரசுகளுக்கு இடையேயான உறவு குறித்து ஆராய ராஜமன்னார் உள்பட பல்வேறு குழுக்கள் அமைக்கப்பட்டு நீண்ட காலம் பேசப்பட்டுள்ளன. மாநிலங்களால்தான் இந்தியா ஒன்றியமாக உருவாகி இருக்கிறது. இந்தத் தத்துவத்தைப் புரிந்துகொள்ள முடியாதவர்களால், இந்திய அரசின் கூட்டாட்சித் தத்துவத்தை ஒருகாலத்திலும் புரிந்து கொள்ள முடியாது.