நெகிழி நெருக்கடி!

குழந்தைப் பருவம் முதல் முதுமை வரை நோய் மற்றும் இறப்புகளை நெகிழிகள் ஏற்படுத்துகின்றன. மேலும், ஆண்டுதோறும் சுமார் 1.5 டிரில்லியன் டாலருக்கும் அதிகமான சுகாதாரம் தொடர்பான பொருளாதார இழப்புகளுக்கும் அவை காரணமாகின்றன.

- பாறப்புறத் இராதாகிருஷ்ணன்

அன்றாட மக்களின் வாழ்க்கையில் முக்கிய அம்சமாக மாறிவிட்ட நெகிழி ஒவ்வொரு நாளும் வாழ்க்கையைப் பயமுறுத்தி வருகிறது. கடந்த இருபது ஆண்டுகளில், உலகில் நெகிழியிலான பொருள்களின் உற்பத்தி முன்னெப்போதும் இல்லாத அளவுக்கு பல மடங்கு அதிகரித்துள்ளது. உலகம் முழுவதும் ஆண்டுதோறும் 46 கோடி டன் நெகிழிப் பொருள்கள் உற்பத்தி செய்யப்படுகின்றன. அதில் மூன்றில் இரண்டு பங்கு ஒருமுறை மட்டுமே பயன்படுத்திவிட்டு தூக்கி எறியக்கூடியவைகளாகும். இந்நிலை நீடித்தால், 2060-ஆம் ஆண்டுவாக்கில் நெகிழிப் பொருள்களின் உற்பத்தி மூன்று மடங்கு அதிகரிக்கும் என அஞ்சப்படுகிறது. 96% நெகிழிகள், பெட்ரோலிய வேதிப்பொருள்கள், எண்ணெய், எரிவாயு, நிலக்கரி, புதைவடிவ எரிபொருள்களால் தயாரிக்கப்படுகின்றன. நெகிழி உற்பத்தியில் சீனா முதலிடத்திலும் அதைத் தொடர்ந்து அமெரிக்கா மற்றும் ஐரோப்பா நாடுகளும் உள்ளன. ஆனால், உலகிலேயே 90% நெகிழிக் கழிவுகளை உற்பத்தி செய்து இயற்கையையே மாசுபடுத்துவதில் இந்தியா முன்னணியில் உள்ளது. நெகிழிக் கழிவுகளால் ஏற்படும் மாசுகள் உலகத்தை அச்சுறுத்தத் தொடங்கியிருக்கும் இன்றைய சோதனைக் காலத்தில் நெகிழிப் பயன்பாட்டை எப்படி குறைப்பது, தவிர்ப்பது, துறப்பது என்று ஒவ்வொரு நாடும் சிந்திக்கத் தொடங்கியுள்ளன.

உலக அளவில் உற்பத்தி செய்யப்படும் நெகிழியின் அளவு 1950-ஆம் ஆண்டில் 20 லட்சம் டன்னிலிருந்து 2022-ஆம் ஆண்டில் 47.5 கோடி டன்னாக உயர்ந்துள்ளது. 2060-ஆம் ஆண்டுக்குள் பயன்பாட்டில் இருக்கும் நெகிழியின் அளவு மூன்று மடங்குகளாக உயரும். 800 கோடி டன் நெகிழிக் கழிவுகள் சுற்றுச்சூழலைப் பாதிப்படையச் செய்து வருகின்றன. மேலும், தற்போது அனைத்து நெகிழிப் பொருள்களிலும், 10 சதவீதத்துக்கும் குறைவானது மட்டுமே மறுசுழற்சி செய்யப்படுகின்றன.