வாழ்ந்து காட்டுவோம் திட்டம்: 4 ஆண்டுகளில் 6,584 பேர் பயன்

தமிழ்நாடு ஊரக புத்தாக்க திட்டத்தின் ‘வாழ்ந்து காட்டுவோம்’ திட்டத்தின் கீழ் வேலூர் மாவட்டத்தில் ரூ.6.73 கோடி மதிப்பில் 6,584 பயனாளிகள் பயனடைந்துள்ளனர் என்று மாவட்ட ஆட்சியர் வி.ஆர்.சுப்புலட்சுமி தெரிவித்தார்.

- 

வேலூர், ஜூலை 6:

இது குறித்து, அவர் வெளியிட்ட செய்திக் குறிப்பு:

‘வாழ்ந்து காட்டுவோம்’ திட்டம் என்பது தமிழ்நாடு அரசால் செயல்படுத்தப்படும் வறுமை ஒழிப்பு, பொருளாதார மேம்பாட்டு திட்டமாகும். கிராமப்புற தொழில்களை ஊக்குவித்தல், மகளிர் சுய உதவிக் குழு உறுப்பினர்களின் பொருளாதார நிலையை மேம்படுத்துதல், கிராமப்புற மகளிர் தொழில்முனைவோர் மூலம் நிலையான தொழில் நிறுவனங்களை உருவாக்குதல் போன்றவை இத்திட்டத்தின் முக்கிய நோக்கமாகும்.

இத்திட்டத்தின் மூலம் தேர்ந்தெடுக்கப்பட்ட ஊராட்சிகளில் தொழில்குழு, உற்பத்தியாளர் குழுக்கள், உற்பத்தியாளர் நிறுவனங்கள் உருவாக்கப்பட்டு அவர்களுக்கான தொடக்க நிதி வழங்குதல், சமுதாய திறன் பள்ளிகள், சமுதாய பண்ணை பள்ளிகள் ஏற்படுத்தி திறன் பயிற்சி, வேளாண் பயிற்சி அளித்தல் போன்ற திட்டங்கள் செயல்படுத்தப்படுகின்றன.