மக்கள் ஆதரவுடன் மீண்டும் திமுக ஆட்சி

முதல்வர் மு.க. ஸ்டாலின் உறுதி

- 

மதுரை, ஜூன் 1: மக்களின் மகத்தான ஆதரவுடன் வருகிற 2026 சட்டப்பேரவைத் தேர்தலில் வெற்றி பெற்று திமுக மீண்டும் ஆட்சி அமைக்கும் என அந்தக் கட்சியின் தலைவரும், தமிழக முதல்வருமான மு.க. ஸ்டாலின் உறுதிபடத் தெரிவித்தார்.

மதுரை உத்தங்குடியில் ஞாயிற்றுக்கிழமை நடைபெற்ற திமுக மாநிலப் பொதுக் குழுக் கூட்டத்தில் அவர் மேலும் பேசியதாவது: மதுரையில் 7-ஆவது முறையாக திமுக பொதுக் குழுக் கூட்டம் தற்போது நடைபெற்றுள்ளது. தமிழகத்தில் 7-ஆவது முறையாக திமுக ஆட்சி அமைக்க அடித்தளம் அமைக்கும் பொதுக்குழுக் கூட்டம். இது வழக்கமான பொதுக் குழுக் கூட்டம் அல்ல. பேரவைத் தேர்தலில் திமுக 7-ஆவது முறையாக வெற்றி வாகை சூட வியூகம் வகுக்கும் பொதுக் குழு.

கண்ணுக்கெட்டிய தொலைவு வரை எதிரிகளே இல்லை என ஆணவமாகச் சொல்ல நான் விரும்புவதில்லை. அதேநேரத்தில், இரவு, பகல் பாராமல், தன்னலம் கருதாமல் கட்சிப் பணியாற்றும் திமுக நிர்வாகிகள், தொண்டர்களால் பேரவைத் தேர்தலில் மீண்டும் நமது கட்சி வரலாறு காணாத வெற்றி பெறும் என்பதை உறுதிபடத் தெரிவிக்கிறேன்.

அனைத்துப் பக்கங்களிலும் எதிரிகள்: திமுக அனுபவிக்கும் சோதனைகளும், நெருக்கடிகளும் சாதாரணமானதல்ல. ஆளும் கட்சியாக இருந்தாலும் எதிர்க்கட்சியைப் போன்றுதான் போராட வேண்டியுள்ளது. இந்தப் போராட்டம் மாநில உரிமைக்கானது.