ஆழ்கடல் விபத்துகள்!

கடந்த பத்தாண்டுகளுக்கும் மேலாக, தமிழ்நாடு மற்றும் கேரளத்தில் ஆழ்கடலில் மீன்பிடித்த படகுகள் மீது கப்பல்கள் மோதி உயிரிழப்புகள், உடைமை இழப்புகள் ஏற்பட்டுள்ளன.

- ப. ஜஸ்டின் ஆன்டணி

ஒரு காலத்தில் சரக்குகளையும் சுற்றுலாப் பயணிகளையும் ஏற்றிச் செல்லப் பயன்படுத்தப்பட்ட கப்பல்கள், இப்போது உயிரிழப்புகளையும் ஏற்படுத்துகின்றன.

மத்திய அரசில் மீனவர்களுக்காக தனி அமைச்சகம் அமைக்கப்பட்டு, கடற்கொள்ளையர்களிடம் இருந்து மீனவர்களைப் பாதுகாக்கும் நோக்கில் நாடாளுமன்றத்தில் ‘கடல் கொள்ளையர் தடுப்பு மசோதா' நிறைவேற்றப்பட்டுள்ளது. பல்வேறு நலத் திட்டங்கள் செயல்படுத்தப்பட்டு வந்தாலும் மீன் பிடிக்கச் செல்லும் மீனவர்கள் சந்திக்கும் சில பிரச்னைகளுக்கு தீர்வு காணப்படவில்லை என்றே கூறவேண்டியுள்ளது.

முன்பைவிட சமீப ஆண்டுகளில் கப்பல்-படகு மோதல் என்பது பெரிதும் விவாதிக்கப்படும் விஷயமாகி உள்ளது. கேரளக் கடல் பகுதிகளில் கப்பல்களும் படகுகளும் மோதும் சம்பவங்கள் தொடர்ந்து அதிகரித்து வருகிறது. இது விஷயத்தில் வாழ்வாதாரத்தை இழந்து தவிக்கும் தமிழக-கேரள மீனவர்களுக்கு நியாயமான மற்றும் முறையான இழப்பீடு வழங்கப்படாவிட்டால், அது எரியும் தீயில் எண்ணெய் ஊற்றுவது போலாகும்.

கடந்த மே 26-ஆம் தேதி மீன்பிடித்து விட்டு, கேரளத்தின் காசர்கோடு கடலில் வந்து கொண்டிருந்த படகு மீது கப்பல் மோதியது. இதில் படகிலிருந்த மீனவர்கள் பலத்த காயமடைந்தனர். மேலும், படகிலிருந்த விலையுயர்ந்த கருவிகள் உள்ளிட்டவை கடலில் மூழ்கி சேதமடைந்தன. இது போன்ற விபத்துகள் அடிக்கடி நிகழ்கின்றன.