விசாரணைக்கு அழைத்துச் சென்றவர் உயிரிழப்பு: 6 போலீஸார் பணியிடை நீக்கம்

சிவகங்கை மாவட்டம், திருப்புவனம் அருகே விசாரணைக்காக அழைத்துச் சென்ற இளைஞர் உயிரிழந்ததையடுத்து, 6 போலீஸாரை பணியிடை நீக்கம் செய்து, மாவட்ட காவல் கண்காணிப்பாளர் ஆஷிஷ் ராவத் ஞாயிற்றுக்கிழமை உத்தரவிட்டார்.

- 

சிவகங்கை/மானாமதுரை, ஜூன் 29:

மதுரை மாவட்டம், திருமங்கலத்தைச் சேர்ந்த நிகிதா (41) தனது தாயுடன் வெள்ளிக்கிழமை மடப்புரம் கோயிலுக்கு காரில் வந்தார். பின்னர், கோயிலின் தற்காலிக காவலாளி அஜித்குமாரிடம் (28) தன்னுடைய காரை ஓரமாக நிறுத்தும்படி நிகிதா கூறினார். அதற்கு அஜித்குமார் தனக்கு கார் ஓட்டத் தெரியாது எனக் கூறி, வேறு ஒருவரை காரை இயக்கச் சொல்லி ஓரமாக நிறுத்தினாராம்.

இதனிடையே, சுவாமி தரிசனம் செய்துவிட்டு வந்த நிகிதா தனது காரில் வைத்திருந்த ஒன்பதுரை பவுன் தங்க நகைகள் காணாமல் போனதாக திருப்புவனம் காவல் நிலையத்தில் புகார் அளித்தார்.

இதையடுத்து, மானாமதுரை குற்றப்பிரிவு தனிப்படை போலீஸார் அஜித்குமார் உள்ளிட்ட சிலரை அழைத்துச் சென்று விசாரித்தனர். மற்றவர்களை விடுவித்துவிட்டனர். விசாரணையின் போது, அஜித்குமாரை போலீஸார் தாக்கியதாகக் கூறப்படுகிறது. இந்த நிலையில், போலீஸார் தாக்கியதில் பலத்த காயமடைந்த அஜித்குமார் உயிரிழந்தார்.