கமல்ஹாசன் மன்னிப்பு கேட்காவிடில் ‘தக்லைஃப்’ படத்தை திரையிடத் தடை

கர்நாடக திரைப்பட வர்த்தக சபை

- 

பெங்களூரு, மே 29: கன்னடம் குறித்த பேச்சுக்கு நடிகர் கமல்ஹாசன் வெள்ளிக்கிழமைக்குள் (மே 30) மன்னிப்பு கேட்காவிட்டால் ‘தக்லைஃப்’ திரைப்படத்தை கர்நாடகத்தில் திரையிடுவதற்குத் தடை விதிக்கப்படும் என்று கர்நாடக திரைப்பட வர்த்தக சபை வியாழக்கிழமை தெரிவித்தது.

அண்மையில் சென்னையில் நடந்த ‘தக் லைஃப்’ திரைப்படத்தின் இசைவெளியீட்டு விழாவில் பேசிய நடிகர் கமல்ஹாசன், கன்னட நடிகர் சிவராஜ்குமாரை வரவேற்கும் வகையில், ‘இது அந்த ஊரில் இருக்கும் என் குடும்பம். அதனால்தான் அவர் (சிவராஜ்குமார்) வந்திருக்கிறார். அதனால்தான் என் பேச்சைத் தொடங்கும்போது உயிரே, உறவே, தமிழே என்று ஆரம்பித்தேன். தமிழில் இருந்து பிறந்ததுதான் உங்கள் பாஷை (கன்னடம்). அதில் நீங்களும் உடன்படுவீர்கள்’ என்று குறிப்பிட்டிருந்தார்.

தமிழில் இருந்துதான் கன்னடம் பிறந்தது என்று அவர் பேசியது கர்நாடகத்தில் பெரும் சர்ச்சையை ஏற்படுத்தியது. இதையடுத்து கமல்ஹாசனுக்கு எதிராக கன்னட அமைப்புகள் தொடர்ந்து போராட்டம் நடத்தி வருகின்றன.