சருமநோயைப் போக்கும் சர்வேஸ்வரன்

நதிக்கரை நாகரிகம் தழைத்தோங்கியது, கௌதம முனிவர் காசித்தல சிவலிங்கத்தை பிரதிஷ்டை செய்து வழிபட்டது, பாண்டிய மன்னனின் சருமநோய் சாபம் நீங்கப் பெற்றது உள்ளிட்ட பல்வேறு சிறப்புகளைக் கொண்டது திருநெல்வேலி, பாளையங்கோட்டையில் அமைந்துள்ள திரிபுராந்தீஸ்வரர் திருக்கோயில்.

- -வெ. கணேசன்

சீமாறன் சீவல்லபன் (815-862) ஆட்சிக்காலத்தில் கட்டப்பட்ட கோயில்.

அக்காலத்தில் நால்வகை வேதங்களைக் கற்றுணர்ந்த அந்தணர்களுக்கு மன்னர்களால் தானமளிக்கப்பட்டு, சீவல்லப சதுர்வேதிமங்கலம் எனப் பெயரிடப்பட்ட இவ்வூரின் பெயர் 1490-இல் கருமாணிக்க மங்கலம் என்றும், 17-ஆம் நூற்றாண்டில் ஆங்கிலேயர் ஆட்சியில் பாளையங்கோட்டை என்றும் ஆனது.

முன்னொரு காலத்தில் பாண்டிய நாட்டின் ஒரு பகுதியை முத்தாலன் என்பவன் ஆண்டு வந்தான். ஒரு நாள், மாலைப்பொழுதில் தனது பட்டத்தரசியுடன் அரண்மனை உப்பரிகையில் தென்றல் தழுவிச் செல்லும் இனிய வேளையில் மகிழ்ச்சியோடு பொழுதை கழித்துக் கொண்டிருந்தான்.

அந்நேரம் பார்த்து முனிவர் ஒருவர் ஏகாந்த சிந்தனையில் அரண்மனை வீதி வழியே நடந்து போய்க்கொண்டிருந்தார். மன்னனின் கெட்ட நேரம், அந்த துறவியைப் பார்த்து பரிகசித்து ஏளனமாக சில வார்த்தைகளை சொல்லிச் சிரித்தான்.

கோபமடைந்த முனிவர், "உன் சரீரம் பொலிவிழந்து, குரூரமாக ஆகக்கடவது!" என்று மன்னனுக்குச் சாபமிட்டு விரைந்து செல்ல, அடுத்த கணமே மன்னனின் கண் பார்வை மங்கியதோடு, தேகமும் குரூரமாய் மாறிவிட்டது.