மின் வாகனங்கள்...காங்கோ குழந்தைத் தொழிலாளர்கள்...

பேராசிரியர் தி.ஜெயராஜசேகர்

- 

காலநிலை மாற்றத்தை எதிர்த்துப் போராடுவதற்கும் வளங்களைப் பாதுகாப்பதற்கும் நிலக்கரிக்குப் பதிலாக நீர் மின் சக்தியையும் புதைபடிவ எரிபொருள்களுக்குப் பதிலாக சூரிய ஆற்றலையும் பெட்ரோல் மற்றும் டீசல் வாகனங்களுக்குப் பதிலாக மின் சார வாகனங்களையும் பயன்படுத்தப் போவதாகவும் அதற்கான முயற்சிகள் தொடங்கி விட்டதாகவும் உலக நாடுகள் கூறுகின்றன.

தூய்மையானவை, பசுமையானவை மற்றும் நிலையானவை எனச் சான்றளிக்கப்படும் மின்சார வாகனங்களில் பயன்படுத்தப்படும் மின்கலன்களின் பின்னால் ரத்தச் சுவடு கொண்ட தீவிர வறுமையும் குழந்தைத் தொழிலாளர்களின் மிகப்பெரும் பங்கும் உள்ளன.

லித்தியம் மற்றும் கோபால்ட் ஆகியவை மின்கலன்களை உருவாக்கப் பயன்படும் அரிய உலோகங்கள். மின்கலனை நிலையாக வைத்து பாதுகாப்பாக செயல்பட வைக்கும் கோபால்ட் ஒரு நீல-சாம்பல் உலோகம். இது பூமியின் மேலோட்டில் அல்லது மேலோட்டுப் பாறைகளில் காணப்படுகிறது. புதிதாக தயாரிக்கப்படும் பாதிக்கும் மேற்பட்ட மின் சார வாகனங்களின் மின்கலன்களில் 4 முதல் 30 கிலோகிராம் வரை கோபால்ட் பயன்படுத்தப்படுகிறது. உலகத் தேவைக்கான கோபால்ட்டின் 70 சதவீதம் காங்கோ என்ற நாட்டிலிருந்து கிடைக்கிறது.