சிவகிரி, பல்லடம் தம்பதிகள் உள்ளிட்ட ஐவர் கொலை வழக்கில் 4 பேர் கைது

ஈரோடு மாவட்டம், சிவகிரி அருகே வயதான தம்பதி கொலை செய்யப்பட்ட வழக்கில் தொடர்புடைய 4 பேரை தனிப்படை போலீஸார் கைது செய்துள்ளனர்.

- 

ஈரோடு, மே 19: பிடிபட்டவர்களுக்கு பல்லடம் அருகே நடந்த 3 பேர் கொலை சம்பவம் உள்ளிட்ட பல்வேறு வழக்குகளில் தொடர்பு உள்ளது விசாரணையில் தெரியவந்துள்ளதாக மேற்கு மண்டல காவல் துறைத் தலைவர் டி.செந்தில் குமார் தெரிவித்துள்ளார்.

ஈரோடு மாவட்டம், சிவகிரி அருகே விளக்கேத்தி மேகரையான் தோட்டத்தில் வசித்து வந்த ராமசாமி (72), அவரது மனைவி பாக்கியம் (63) ஆகியோர் பணம், நகைக்காக கடந்த ஏப். 28-ஆம் தேதி இரவு கொலை செய்யப்பட்டனர். இவர்களிடம் இருந்து பத்தே முக்கால் பவுன் நகை கொள்ளையடிக்கப்பட்டது.

இந்தக் கொலை வழக்கில் குற்றவாளிகளைக் கைது செய்ய மேற்கு மண்டல காவல் துறைத் தலைவர் டி.செந்தில்குமார், கோவை சரக துணைத் தலைவர் வி.சசிமோகன் ஆகியோர் மேற்பார்வையில், ஈரோடு மாவட்ட காவல் கண்காணிப்பாளர் ஏ.சுஜாதா தலைமையில் 12 தனிப்படை கள் அமைக்கப்பட்டு விசாரணை நடந்து வந்தது. இந்த வழக்கில் தொடர்புடைய 4 பேரை தனிப்படை போலீஸார் ஞாயிற்றுக்கிழமை கைது செய்துள்ளனர்.

இதுகுறித்து மேற்கு மண்டல ஐ.ஜி. டி.செந்தில்குமார் ஈரோடு மாவட்ட காவல் அலுவலகத்தில் செய்தியாளர்களிடம் திங்கள்கிழமை காலை கூறியதாவது: சிவகிரி தம்பதி கொலை வழக்கு தொடர்பாக கண்காணிப்பு கேமரா பதிவுகளைக் கொண்டு விசாரணை நடத்தப்பட்டது.