ரூ.1.58 லட்சம் கோடி செமிகண்டக்டர் திட்டங்கள் செயலாக்கம்

பிரதமர் மோடி

- 

புது தில்லி, செப். 2: நாட்டில் 18 பில்லியன் டாலர் மதிப்பிலான (சுமார் ரூ.1.58 லட்சம் கோடி) செமிகண்டக்டர் திட்டங்கள் செயல்படுத்தப்பட்டு வருகின்றன என்று பிரதமர் நரேந்திர மோடி தெரிவித்தார். இந்தியாவின் சிறிய 'சிப்', உலகில் பெரும் மாற்றத்தை ஏற்படுத்தும் நாள் வெகு தொலைவில் இல்லை என்றும் அவர் உறுதிபடத் தெரிவித்தார்.

நாட்டின் செமிகண்டக்டர் உற்பத்தித் துறைக்கு உத்வேகம் ஏற்படுத்தும் நோக்கில், தில்லியில் 'செமிகான் இந்தியா-2025' எனும் 3 நாள் சர்வதேச கருத்தரங்கம் செவ்வாய்க்கிழமை தொடங்கியது. செமிகண்டக்டர் நிறுவன தலைமைச் செயல் அதிகாரிகள், துறைசார் நிபுணர்கள், புத்தாக்க தொழில் முனைவோர் என 50 நாடுகளைச் சேர்ந்த 2,500 பிரதிநிதிகள், பல்வேறு மாநில மாணவர்கள் என 20,000-க்கும் மேற்பட்டோர் பங்கேற்றுள்ள இந்த மாநாட்டை பிரதமர் மோடி தொடங்கிவைத்துப் பேசியதாவது: கச்சா எண்ணெய் கருப்புத் தங்கம் என்றால், சிப் என்பது எண்ம வைரமாகும். கச்சா எண்ணெய் முந்தைய நூற்றாண்டை வடிவமைத்தது; தற்போதைய 21-ஆம் நூற்றாண்டின் சக்தி, சிறிய சிப்பில்தான் செறிந்துள்ளது. அளவில் சிறியது என்றாலும், இவை உலகின் வளர்ச்சியை கணிசமாக விரைவுபடுத்த வல்லவை.