முத்திரை பதிக்கும் முத்தான திட்டங்களை செயல்படுத்தும் அரசு!

கடந்த நான்கு ஆண்டுகளில், வரலாறு பேசும் வகையில், ஏராளமான சாதனைத் திட்டங்களை திமுக அரசு செயல்படுத்தியுள்ளது.

- 

'நாள்தோறும் நலத்திட்டங்கள்' என்பதோடு, தேர்தல் நேரத்தில் அளித்த வாக்குறுதிகளில் பெருமளவு நிறைவேற்றப்பட்டுள்ளது.

2021-ஆம் ஆண்டு சட்டப்பேரவைத் தேர்தலில் திமுக தலைமையிலான கூட்டணி மாபெரும் வெற்றி பெற்றது. இதையடுத்து, 7-ம் தேதி சென்னை கிண்டியில் உள்ள ஆளுநர் மாளிகையில் உள்ள திறந்தவெளி மைதானத்தில், எளிய விழாவில் முதல்வராக மு.க.ஸ்டாலின் பதவியேற்றார்.

பதவியேற்ற அன்றே தலைமைச் செயலகத்தில் குடும்ப அட்டைதாரர்களுக்கு இரண்டு தவணைகளாக தலா ரூ.2 ஆயிரம் கொரோனா நிவாரணம், குடும்ப அட்டைதாரர்களுக்கு 14 மளிகைப் பொருள்கள் தொகுப்பு, இலங்கை தமிழர் குடும்பங்களுக்கு ரூ.4 ஆயிரம் நிவாரணம் வழங்கப்பட்டது. ஆவின் பால் விலை குறைப்பு, பெண்கள், திருநங்கைகள், மாற்றுத்திறனாளிகளுக்கு கட்டணமில்லா பேருந்து பயணம் போன்ற நலத்திட்டங்கள் உடனே செயல்படுத்தப்பட்டன.

கல்விக்கும், மருத்துவத்துக்கும் முக்கியத்துவம் அளிப்பதோடு, அனைத்துத் துறைகளிலும் மக்களுக்கான திட்டங்களை மு.க.ஸ்டாலின் தலைமையிலான திமுக அரசு மேற்கொண்டு வருகிறது.

முத்திரை பதிக்கும் முத்தான திட்டங்கள்:

- மக்களின் குறைகளை உடனுக்குடன் தீர்க்க, குடியிருப்புப் பகுதிகளில் மாதந்தோறும் முதல்வரின் திட்ட முகாம்கள்.

- 2,500 சதுர அடிக்குள் வீடுகள் கட்ட உடனே அனுமதி அளிக்கும் வகையில் ஆன்லைனில் அனுமதி முறை.

- சென்னை கிளாம்பாக்கத்தில் பிரம்மாண்டமான கலைஞர் நூற்றாண்டு பேருந்து முனையம்.

- மதுரை அலங்காநல்லூரில் கலைஞர் நூற்றாண்டு ஏறுதழுவுதல் அரங்கம்.

- அரசு நலத்திட்ட உதவிகள் வீடு தேடி வரும் வகையில், 'உங்களைத் தேடி உங்கள் ஊரில்' திட்டம்.

- ஆதிதிராவிடர், பழங்குடியினர் நல வாரியம் அமைப்பு.

- பேரறிஞர் அண்ணா, கலைஞர் கருணாநிதி நினைவிடங்கள் சீரமைப்பு. அரிய புகைப்படங்கள், நவீன அம்சங்களுடன் புதுப்பொலிவு.

- முதல்வர் பொது நிவாரண நிதிக்கு அளிக்கப்படும் நன்கொடைகளின் செலவினங்கள் வெளிப்படையாக அறிவிப்பு.