தொடர் மழையால் வெள்ளக்காடான மகாராஷ்டிரம்

8 பேர் உயிரிழப்பு; நூற்றுக்கணக்கானோர் மீட்பு

- 

மும்பை, ஆக. 19: மகாராஷ்டிரத்தில் இடைவிடாது பெய்துவரும் தொடர்மழையால் கடந்த இரண்டு நாள்களில் 8 பேர் உயிரிழந்தனர்.

மாநிலம் முழுவதும் பரவலாக வெள்ளம், நிலச்சரிவுகள், மின்சாரம் தாக்கி உயிரிழப்புகள் என பலத்த சேதங்கள் ஏற்பட்டுள்ளன. மும்பை, தாணே, புணே, ராய்கட், நாந்தேட், கோல்ஹாபூர் போன்ற மாவட்டங்கள் கடுமையாகப் பாதிக்கப்பட்டுள்ளன.

மகாராஷ்டிரத்தில் கடந்த சில நாள்களாக பலத்த மழை நீடித்து வருகிறது. இதனால் மாநிலத்தின் முக்கிய ஆறுகளான குண்டலிகா, சாவித்ரி, பஞ்சகங்கா, வார்ணா, கோய்னா ஆகியவை அபாய அளவைத் தாண்டி பாய்ந்து வருகின்றன. இதனால், ஆறுகளின் கரையோரப் பகுதிகள் முழுவதுமாக வெள்ளத்தில் மூழ்கியுள்ளன.

பல இடங்களில் சாலைகள் துண்டிக்கப்பட்டு, போக்குவரத்து பெரிதும் பாதிக்கப்பட்டுள்ளது. கோல்ஹாபூர்-ரத்னகிரி நெடுஞ்சாலையில் ஏற்பட்ட நிலச்சரிவு காரணமாக பல மணி நேரம் போக்குவரத்து முடங்கியது.