மொழியைத் தேர்வு செய்வதில் தமிழக மாணவர்களுக்கு சுதந்திரமில்லை

மொழியைத் தேர்வு செய்து படிப்பதில் தமிழக மாணவர்களுக்கு சுதந்திரமில்லை என ஆளுநர் ஆர்.என்.ரவி குற்றஞ்சாட்டினார்.

- 

திருநெல்வேலி, பிப். 28:

மும்மொழிக் கொள்கை விவகாரத்தில் முதல்வர் மு.க.ஸ்டாலினுக்கும், மத்திய கல்வி அமைச்சர் தர்மேந்திர பிரதானுக்கும் ஏற்கெனவே கருத்து மோதல்கள் எழுந்த நிலையில், இந்த விவகாரத்தை ஆளுநரும் கையில் எடுத்துள்ளார்.

அகில உலக அய்யா பதிகள் கூட்டமைப்பின் சார்பில், அய்யா வைகுண்டரின் 193-ஆவது அவதார தின விழாவை முன்னிட்டு நூல் வெளியீட்டு விழா மற்றும் அய்யாவழி ஆளுமைகளைக் கௌரவிக்கும் விழா, திருநெல்வேலியை அடுத்த செங்குளத்தில் உள்ள தனியார் திருமண மண்டபத்தில் வெள்ளிக்கிழமை நடைபெற்றது.

இந்த விழாவுக்கு ஆளுநர் ஆர்.என்.ரவி தலைமை வகித்து தமிழ், மலையாளம், ஹிந்தி, ஆங்கிலம் ஆகிய மொழிகளில் பதிப்பிக்கப்பட்டுள்ள ஸ்ரீ மகா விஷ்ணுவின் அவதாரம் அய்யா வைகுண்டர் அருளிய சநாதன உபதேசங்கள்' என்ற நூலை வெளியிட்டார். அதை ஆர். சிவமுருகன் ஆதித்தன், பி. திருமாறன், கோல்டன் பி. செல்வராஜ், எஸ்.ராஜா ஆகியோர் பெற்றுக் கொண்டனர்.