தமிழகத்தில் 5.67 கோடி வாக்காளர்கள்

இறுதிப்பட்டியல் வெளியீடு- 74 லட்சம் பேர் நீக்கம்

- 

சிறப்பு வாக்காளர் தீவிர திருத்தப் பணிக்கு (எஸ்ஐஆர்) பிந்தைய இறுதி வாக்காளர் பட்டியலின்படி, தமிழகத்தில் 5.67 கோடி பேர் உள்ளனர். 74 லட்சம் பேரின் பெயர்கள் பட்டியலிலிருந்து நீக்கப்பட்டுள்ளன.

தமிழகத்தில் அதிக வாக்காளர்களைக் கொண்ட தொகுதியாக சோழிங்கநல்லூர் (5,39,991) உள்ளது. குறைந்த வாக்காளர் எண்ணிக்கை கொண்ட தொகுதியாக துறைமுகம் (1,16,896) உள்ளது.

சென்னை தலைமைச் செயலகத்தில் இறுதி வாக்காளர் பட்டியலை திங்கள்கிழமை வெளியிட்ட தமிழக தலைமைத் தேர்தல் அதிகாரி அர்ச்சனா பட்நாயக், இந்த விவரங்களைத் தெரிவித்தார்.

சட்டப்பேரவைத் தேர்தலை எதிர்நோக்கியிருக்கும் மாநிலங்களில் வாக்காளர் பட்டியல் சிறப்பு தீவிர திருத்தப் பணிகளை தேர்தல் ஆணையம் முன்னெடுத்தது. அந்த வகையில் தமிழகத்தில் கடந்த ஆண்டு நவம்பர் மாதம் வீடுதோறும் கணக்கீட்டுப் படிவம் வழங்கி 6.41 கோடி வாக்காளர்களின் விவரங்கள் சரி பார்க்கப்பட்டன.

அதைத் தொடர்ந்து கடந்த ஆண்டு டிச. 19-ஆம் தேதி வரைவு வாக்காளர் பட்டியல் வெளியிடப்பட்டது. அதில் 97,37,831 வாக்காளர்கள் நீக்கப்பட்டனர். இதனால் மாநிலத்தின் வாக்காளர் எண்ணிக்கை 5.43 கோடியாகக் குறைந்தது.