அதிரடி நாயகன் தர்மேந்திரா!

இந்திய சினிமாவின் இரும்பு மனிதன், வசீகரத்தின் மறுஉருவம் என பல பட்டங்களுடன் 60 ஆண்டுகளுக்கு மேலாக வெள்ளித்திரையை ஆக்கிரமித்தவர் நடிகர் தர்மேந்திரா (89). பஞ்சாபில் சாதாரண கிராமத்தில் பிறந்து, கனவுகளுடன் மும்பை வந்து, ஹிந்தி திரையுலகின் 'ஹீ-மேனாக' உயர்ந்தது இவரது வெற்றிச் சரித்திரம். இந்தப் பெருங்கலைஞரின் மறைவுச் செய்தி, திரையுலகினரையும் கோடிக்கணக்கான ரசிகர்களையும் மிகுந்த சோகத்தில் ஆழ்த்தியுள்ளது.

- 

பிரிட்டிஷ் இந்தியாவின் பஞ்சாபில் உள்ள நஸ்ராலி கிராமத்தில் ஒரு பள்ளி ஆசிரியரின் மகனாக, தர்மேந்திரா 1935, டிசம்பர் 8-ஆம் தேதி பிறந்தார். லூதியானாவில் பள்ளி, கல்லூரிப் படிப்பை முடித்தவர், திரையுலகின் மீது இருந்த தீராத காதலால் மும்பைக்கு வந்தார். குறிப்பாக, ஃபிலிம்ஃபேர் பத்திரிகை நடத்திய தேசிய அளவிலான புதிய திறமையாளரை அடையாளம் காணும் போட்டியில் வெற்றி பெற்றதே, இவரது சினிமா கனவுக்குத் துளிர்விட்டது. 1960-இல் வெளியான 'தில் பி தேரா ஹம் பி தேரே' படத்தின் மூலம் தர்மேந்திரா தனது திரைப்பயணத்தைத் தொடங்கினார். ஆரம்பத்தில் தனது வசீகரமான தோற்றத்தால் காதல் நாயகனாக, மென்மையான கதாபாத்திரங்களில் நடித்து, பின்னர் அதிரடி வேடங்களுக்கு மாறினார். 1966-இல் வெளியான 'ஃபூல் ஔர் பத்தர்' திரைப்படம், இவரை ஒரு வெற்றிகரமான அதிரடி நாயகனாக நிறுவியது; நட்சத்திர அந்தஸ்தையும் பெற்றுத் தந்தது.

1970-களின் முற்பகுதியில், காதல், நகைச்சுவை, அதிரடி எனப் பலவிதமான கதாபாத்திரங்களில் நடித்து, தர்மேந்திரா தனது பன்முகத் திறமையை நிரூபித்தார்.