மிரட்டலுக்கு பயந்து பாஜகவுடன் அதிமுக கூட்டணி

முதல்வர் மு.க.ஸ்டாலின்

- 

சென்னை, மே 3: பாஜகவின் மிரட்டலுக்கு பயந்து அக்கட்சியுடன் அதிமுக கூட்டணி அமைத்துள்ளது என்று முதல்வரும் திமுக தலைவருமான மு.க.ஸ்டாலின் கூறினார்.

அண்ணா அறிவாலயத்தில் முதல்வர் மு.க.ஸ்டாலின் தலைமையில் சனிக்கிழமை நடைபெற்ற மாவட்டச் செயலர்கள் கூட்டத்தில் அவர் பேசியது:

நம்முடைய பலமே, நம்முடைய கட்சியின் கட்டுமானம்தான். இத்தகைய நிர்வாகக் கட்டமைப்பு எந்தக் கட்சிக்கும் கிடையாது. அந்தக் கட்டமைப்பை காலம்தோறும் புதுப்பித்துக் கொண்டே இருக்கிறோம். தடங்கல் என்பது எப்போதும் இருக்கும். அதை உங்களிடம் இருக்கும் உழைப்பால் வெல்லுங்கள் என்பதுதான் என்னுடைய வேண்டுகோள்.

வெல்ல முடியாதவர்கள், மத்திய புலனாய்வு அமைப்புகள் மூலம் மிரட்டி அசிங்கப்படுத்த நினைப்பார்கள். அவர்களது மிரட்டல்களுக்கு உண்மையான காரணம் எது என்பது மக்களுக்குத் தெரியும். எனவே, பாஜகவின் அச்சுறுத்தலை அரசியல் ரீதியாக நாம் எதிர்கொள்வோம்.