உறவு மேம்பட வெளிப்படையான கருத்துப் பரிமாற்றம் முக்கியம்

தற்போதைய கடினமான உலகச் சூழலில் இரு நாடுகளிடையேயான உறவு மேம்பட, வெளிப்படையான கருத்துப் பரிமாற்றமும், பரஸ்பர நம்பிக்கையும் மிக முக்கியம் என்று சீனாவிடம் இந்தியத் தரப்பில் வலியுறுத்தப்பட்டது.

- 

பெய்ஜிங், ஜூலை 14: 'தற்போதைய கடினமான உலகச் சூழலில் இரு நாடுகளிடையேயான உறவு மேம்பட, வெளிப்படையான கருத்துப் பரிமாற்றமும், பரஸ்பர நம்பிக்கையும் மிக முக்கியம்' என்று சீனாவிடம் இந்தியத் தரப்பில் வலியுறுத்தப்பட்டது.

சீன தலைநகர் பெய்ஜிங்கில் அந் நாட்டு துணை அதிபர் ஹான் ஜெங் உடனான சந்திப்பின்போது இக் கருத்தை வெளியுறவு அமைச்சர் எஸ்.ஜெய்சங்கர் தெரிவித்துள்ளார்.

ஆயுதங்கள் வழங்கல் உள்ளிட்ட பல்வேறு வழிகளில் பாகிஸ்தானுக்கு சீனா தொடர்ந்து ஆதரவளித்து வரும் சூழலில் ஜெய்சங்கர் இக் கருத்தைப் பதிவு செய்திருப்பது முக்கியத்துவம் வாய்ந்ததாகப் பார்க்கப்படுகிறது.

இரண்டு நாடுகள் சுற்றுப்பயணம் மேற்கொண்டுள்ள ஜெய்சங்கர், தனது சிங்கப்பூர் பயணத்தை முடித்துக்கொண்டு சீனாவின் தியான்ஜின் நகரில் செவ்வாய்க்கிழமை (ஜூலை 15) நடைபெறும் ஷாங்காய் ஒத்துழைப்பு அமைப்பின் (எஸ்சிஓ) வெளியுறவு அமைச்சர்கள் கூட்டத்தில் பங்கேற்பதற்காக திங்கள்கிழமை பெய்ஜிங் சென்றார்.