என்ஜின்களுக்கு எரிபொருள் தடைபட்டது

ஏர் இந்தியா விமான விபத்து குறித்த முதல்கட்ட விசாரணை அறிக்கை

- 

புது தில்லி, ஜூலை 12: அகமதாபாத்-லண்டன் ஏர் இந்தியா விமானம் புறப்பட்ட சில விநாடிகளில் அதன் 2 என்ஜின்களுக்கும் எரிபொருள் செல்வது தடைபட்டது. அதைத் தொடர்ந்து, விமானியின் அறையில் குழப்பம் ஏற்பட்டு விமானம் விபத்துக்குள்ளானது என்று விமான விபத்து புலனாய்வு அமைப்பின் (ஏஏஐபி) முதல்கட்ட விசாரணையில் தெரியவந்துள்ளது.

என்ஜின்களின் எரிபொருள் கட்டுப்பாட்டு சுவிட்சுகள் கட்-ஆஃப் நிலையில் இருந்தது தொடர்பாக விமானத்தை இயக்கிய இரண்டு விமானிகளும் உரையாடிக்கொள்வது விமானத்தின் கருப்புப் பெட்டியில் இடம்பெற்றுள்ள குரல் பதிவு இயந்திரத்தில் பதிவாகியுள்ளதாகவும் ஏஏஐபி தனது அறிக்கையில் குறிப்பிட்டுள்ளது.

டாடா குழுமத்தின் ஏர் இந்தியா நிறுவனத்துக்குச் சொந்தமான போயிங் 787 ட்ரீம்லைனர் (ஏஐ 171) ரக விமானம், வெளிநாட்டினர் உள்பட 242 பேருடன் (12 ஊழியர்கள், 230 பயணிகள்) குஜராத் மாநிலம் அகமதாபாத் சர்தார் வல்லபபாய் படேல் சர்வதேச விமான நிலையத்தில் இருந்து லண்டனுக்கு கடந்த ஜூன் 12-ஆம் தேதி பிற்பகலில் புறப்பட்டது.