தெலங்கானா மருந்து ஆலை வெடிவிபத்து: உயிரிழப்பு 36-ஆக உயர்வு

தெலங்கானா மாநிலம், சங்காரெட்டி மாவட்டத்தில் உள்ள மருந்து ஆலையில் உலை வெடித்து திங்கள்கிழமை ஏற்பட்ட விபத்தில் உயிரிழந்தவர்களின் எண்ணிக்கை 36-ஆக அதிகரித்துள்ளது.

- 

சங்காரெட்டி, ஜூலை 1:

ஆலையை நேரடியாக ஆய்வு செய்த முதல்வர் ரேவந்த் ரெட்டி, விபத்து நிகழ்ந்து 24 மணிநேரமாகியும் ஆலை உரிமையாளர்கள் களத்துக்கு வந்து, பாதிக்கப்பட்டவர்களைச் சந்திக்காததற்கு கடும் அதிருப்தி தெரிவித்தார்.

சங்காரெட்டி மாவட்டத்தின் பாஷாமைலாரம் தொழிற்பேட்டையில் சிகாச்சி மருந்து ஆலை செயல்பட்டு வந்தது. இந்த ஆலையில் திங்கள்கிழமை உலை வெடித்து பயங்கர விபத்து ஏற்பட்டது. விபத்து குறித்து தகவலறிந்ததும் தீயணைப்புப் படையினர் விரைந்து வந்து, மீட்பு மற்றும் நிவாரண பணிகளைத் தொடங்கினர். 10-க்கும் மேற்பட்ட தீயணைப்பு வாகனங்களின் உதவியோடு பல மணி நேர முயற்சிக்குப் பிறகு தீ கட்டுக்குள் கொண்டு வரப்பட்டது. தொடர்ந்து, தேசிய மற்றும் மாநில மீட்புப் படையினரும் மீட்புப் பணியில் இணைந்தனர்.

சம்பவம் நிகழ்ந்த நேரத்தில் ஆலையில் 143-க்கும் மேற்பட்ட தொழிலாளர்கள் பணியில் இருந்ததாகக் கூறப்பட்ட நிலையில், விபத்தில் உயிரிழந்தவர்களின் எண்ணிக்கை 36-ஆக அதிகரித்துள்ளது.