விமான விபத்து: உள்துறைச் செயலர் தலைமையில் உயர்நிலை விசாரணைக் குழு

3 மாதங்களில் அறிக்கை தாக்கல் செய்கிறது

- 

புது தில்லி, ஜூன் 14: அகமதாபாத் ஏர் இந்தியா விமான விபத்துக் கான காரணங்களை ஆராய்ந்து, எதிர்காலத்தில் இதுபோன்ற சம்பவங்களைத் தடுப்பதற்கான விரிவான வழிகாட்டுதல்களைப் பரிந்துரைக்க மத்திய உள்துறைச் செயலர் தலைமையில் பல்துறை நிபுணர்கள் அடங்கிய உயர்நிலைக் குழு அமைக்கப்பட்டுள்ளது.

கடந்த வியாழக்கிழமை, லண்டன் நோக்கிச் சென்ற ஏர் இந்தியா நிறுவனத்தின் 'போயிங் 787-8 ட்ரீம்லைனர்' விமானம் அகமதாபாத் விமான நிலையத்திலிருந்து புறப்பட்ட சிறிது நேரத்திலேயே விபத்துக்குள்ளானது.

இதில் விமானிகள், பணியாளர்கள், பயணிகள் உள்பட 241 பேர் இறந்தனர். விமானம் விழுந்து வெடித்துச் சிதறிய மருத்துவக் கல்லூரி வளாகத்தில் இருந்தவர்களும் 20-க்கும் மேற்பட்டோர் உயிரிழந்தனர்.

நாட்டையே உலுக்கிய இந்தக் கோர விபத்து குறித்து மத்திய அரசின் விமான விபத்துகளுக்கான புலனாய்வு அமைப்பு (ஏஏஐபி) ஏற்கெனவே விசாரிக்கத் தொடங்கியுள்ளது. இந்நிலையில், மத்திய உள்துறைச் செயலர் கோவிந்த் மோகன் தலைமையில் புதிய உயர்நிலைக் குழு அமைக்கப்பட்டுள்ளது.