வக்ஃப் திருத்த மசோதா: சமூகத்தை நிரந்தரமாக பிளவுபடுத்தும்

சமூகத்தை நிரந்தரமாக பிளவுபடுத்தும் பாஜக வியூகத்தின் ஓர் அங்கமே வக்ஃப் சட்டத் திருத்த மசோதா; இது, அரசமைப்புச் சட்டத்தின் மீதான அப்பட்டமான தாக்குதல் என்று நாடாளுமன்ற காங்கிரஸ் குழுத் தலைவர் சோனியா காந்தி வியாழக்கிழமை சாடினார்.

- 

புது தில்லி, ஏப். 3:

மோடி அரசு நாட்டை படுகுழிக்கு இட்டுச் செல்வதாகவும் அவர் குற்றஞ்சாட்டினார்.

பழைய நாடாளுமன்றத்தில் காங்கிரஸ் எம்.பி.க்களின் கூட்டம் வியாழக்கிழமை நடைபெற்றது. கட்சித் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி உள்ளிட்டோர் பங்கேற்ற இக்கூட்டத்தில், வக்ஃப் உள்ளிட்ட பல்வேறு விவகாரங்களில் மத்திய அரசை விமர்சித்து சோனியா காந்தி பேசியதாவது:

மக்களவையில் கடந்த புதன்கிழமை வக்ஃப் சட்டத் திருத்த மசோதாவை மத்திய அரசு ‘பலவந்தமாக’ நிறைவேற்றியுள்ளது. இந்த மசோதா, அரசமைப்புச் சட்டத்தின் மீதான அப்பட்டமான தாக்குதல் என்பதே காங்கிரஸின் நிலைப்பாடு. ‘ஒரே நாடு, ஒரே தேர்தல்’ திட்டமும் அரசமைப்புச் சட்டத்தை சீர்குலைக்கும் மற்றொரு முயற்சியாகும். இதையும் காங்கிரஸ் கடுமையாக எதிர்க்கும்.

நாடாளுமன்றத்தில் மகளிர் இட ஒதுக்கீட்டை உடனடியாக அமல்படுத்துவதோடு, பட்டியலின, பழங்குடியின மற்றும் இதர பிற்படுத்தப்பட்ட சமூகங்களைச் சேர்ந்த பெண்களுக்கு உள்ஒதுக்கீடு வழங்க வேண்டுமென்ற காங்கிரஸின் கோரிக்கையை மத்திய அரசு உள்நோக்கத்துடன் புறக்கணித்து வருகிறது.