கிராம கோயில் பூசாரிகள் இரு சக்கர வாகனம் வாங்க தலா ரூ.12,000 மானியம்

அமைச்சர் பி.கே.சேகர்பாபு அறிவிப்பு

- 

சென்னை, ஏப். 17: கிராம கோயில் பூசாரிகள், ஆதிதிராவிடர் கோயில் அர்ச்சகர்கள் 10 ஆயிரம் பேருக்கு இரு சக்கர வாகனம் வாங்க தலா ரூ.12,000 மானியம் வழங்கப்படும் என இந்து சமய அறநிலையத்துறை அமைச்சர் பி.கே.சேகர்பாபு அறிவித்தார்.

சட்டப்பேரவையில் வியாழக்கிழமை நடைபெற்ற இந்து சமய அறநிலையத்துறை மானியக் கோரிக்கை மீதான விவாதத்துக்கு பதிலளித்து அமைச்சர் பி.கே.சேகர்பாபு வெளியிட்ட அறிவிப்புகள்:

ஆயிரம் இணையர்களுக்கு திருக்கோயில்கள் சார்பில் 4 கிராம் தங்கத்தாலி உள்பட ரூ.70 ஆயிரம் மதிப்பில் சீர்வரிசை வழங்கி திருமணம் நடத்தி வைக்கப்படும். ஒருகால பூசை செய்யும் அர்ச்சகர்களுக்கு தைத்திருநாளில் புத்தாடையும், மாத ஊக்கத்தொகை ரூ.1,000-இலிருந்து ரூ.1,500-ஆகவும் உயர்த்தி வழங்கப்படும்.

ஒரு கால பூசைத்திட்ட அர்ச்சகர்கள், கிராம கோயில் பூசாரிகள், ஆதி திராவிடர் திருக்கோயில் அர்ச்சகர்கள் 10 ஆயிரம் பேருக்கு இரு சக்கர வாகனம் வாங்க தலா ரூ.12 ஆயிரம் மானியம் வழங்கப்படும். இதற்காக ரூ.12 கோடி நிதி ஒதுக்கீடு செய்யப்படவுள்ளது.