அணு ஆயுதம் தயாரிப்பதே ஈரானுக்கு ஒரே வழி

அமெரிக்காவுக்கு எச்சரிக்கை

- 

டெஹ்ரான், ஏப். 1: அமெரிக்கா மற்றும் அதன் கூட்டணி நாடுகள் தங்கள் மீது தாக்குதல் நடத்தினால், அதை எதிர்கொள்ள தங்களுக்கு அணு ஆயுதம் தயாரிப்பதைத் தவிர வேறு வழியில்லை என்று ஈரான் தலைமை மதகுரு அயதுல்லா கமேனியின் முதன்மை ஆலோசகர் அலி லரிஜானி எச்சரித்துள்ளார்.

இது குறித்து அரசுத் தொலைக்காட்சியில் அவர் பேசியதாவது: தற்போதைய நிலையில் எங்களது நடவடிக்கைகள் அணு ஆயுதத்தை நோக்கி நகரவில்லை. ஆனால் எங்கள் அணுசக்தி திட்டங்கள் தொடர்பான விவகாரத்தில் அமெரிக்காவோ, அதன் கூட்டணி நாடுகளோ தவறான முடிவுகளை எடுத்தால், அது அணு ஆயுதத் தயாரிப்பை நோக்கி ஈரானை வலுக்கட்டாயமாக அழைத்துச் செல்லும். ஏனெனில், ஈரானுக்கு தன்னைப் பாதுகாத்துக்கொள்ள வேண்டிய பொறுப்பும் உரிமையும் இருக்கின்றன.

எங்களுக்கு அணு ஆயுதம் தேவையில்லை. ஆனால் அமெரிக்கா எங்களுக்கு நெருக்கடி கொடுத்தால் அத்தகைய ஆயுத பலத்தை அடைவதைத் தவிர ஈரானுக்கு வேறு வழியில்லை என்றார் அலி லரிஜானி.

ஈரானுக்கும் அமெரிக்கா உள்ளிட்ட ஐ.நா. பாதுகாப்பு கவுன்சில் நிரந்தர உறுப்பு நாடுகள் மற்றும் ஜெர்மனிக்கும் இடையே கடந்த 2015 ஆம் ஆண்டில் அணுசக்தி ஒப்பந்தம் கையொப்பமானது. அந்த ஒப்பந்தத்தில், தனது அணுசக்தி திட்டங்கள் அணு ஆயுதம் தயாரிப்பதற்கானவை இல்லை என்பதை உறுதி செய்ய ஈரான் சம்மதித்தது. அதற்குப் பதிலாக, ஈரான் மீது விதிக்கப்பட்டிருந்த பொருளாதாரத் தடைகளை நீக்குவதாக வல்லரசு நாடுகள் ஒப்புக் கொண்டன.