அமோக விளைச்சலால் பலாப்பழம் விலை வீழ்ச்சி

அரியலூர் மாவட்டத்தில் நிகழாண்டு பலாப்பழ அமோக விளைச்சல் காரணமாக, சந்தையில் பலாப்பழங்களின் விலை கடுமையாகச் சரிந்துள்ளது.

- நமது நிருபர்

நமது நிருபர் அரியலூர், ஜூன் 15: இதனால் விவசாயிகள் கவலையில் உள்ளனர்.

அரியலூர் மாவட்டத்தில் செம்மண் நிறைந்த பகுதியான உடையார்பாளையம், தத்தனூர், ஜெயங்கொண்டம், ஆண்டிமடம், குவாகம், கொடுக்கூர், வரதராசன்பேட்டை, தென்னூர், தத்தூர், காடுவெட்டி, செந்துறை, பொன்பரப்பி, மருதூர், கல்லாத்தூர் உள்ளிட்ட பகுதிகளில் பலாப்பழம் அதிகளவில் சாகுபடி செய்யப்பட்டுள்ளது.

இங்கு விளையக்கூடிய பலாப்பழமும், அருகிலுள்ள கடலூர் மாவட்டம், பண்ருட்டி தென்பகுதியில் வளம் நிறைந்த செம்மண் பகுதியில் அடர்ந்து வளர்ந்துள்ள முந்திரிக்காடுகளுக்கு இடையே விளையும் பலாப்பழமும் தரத்துக்கும் சுவைக்கும் பெயர்பெற்றது.

இதன் தனித்துவமான சுவை காரணமாக தமிழகம் உள்ளிட்ட வெளிமாநிலங்களைச் சேர்ந்தவர்களும் அரியலூர் மாவட்ட பலாப்பழத்தை விரும்பி வாங்கிச் செல்வர்.

எனினும் விவசாயிகள் வாழ்வில் ஏற்றம் காணும் வகையில் பலாப்பழ விலை எப்போதும் இருப்பது இல்லை. இந்நிலையில், நிகழாண்டு பலாப்பழ உற்பத்தி அதிகரித்துள்ள நிலையில், அதன் விலை வீழ்ச்சிகண்டு கிலோ ரூ.10 என்ற அளவில் விலைபோகிறது.