தீப்தியின் தீர்க்கமான ஆட்டத்தில் இந்தியா வெற்றி

இங்கிலாந்து மகளிர் அணிக்கு எதிரான முதல் ஒருநாள் கிரிக்கெட்டில் இந்திய மகளிர் அணி 4 விக்கெட்டுகள் வித்தியாசத்தில் வெற்றி பெற்றது.

- 

சௌதாம்ப்டன், ஜூலை 17: நிதானமான ஆட்டத்தால் அணிக்கு வெற்றி தேடித்தந்த தீப்தி சர்மா, ஆட்டநாயகி விருது பெற்றார்.

இந்திய நேரப்படி புதன்கிழமை நள்ளிரவு நிறைவடைந்த இந்த ஆட்டத்தில் முதலில் இங்கிலாந்து 50 ஓவர்களில் 6 விக்கெட்டுகள் இழப்புக்கு 258 ரன்கள் சேர்க்க, இந்தியா 48.2 ஓவர்களில் 6 விக்கெட்டுகள் இழந்து 262 ரன்கள் எடுத்து வென்றது.

முன்னதாக டாஸ் வென்ற இங்கிலாந்து, பேட்டிங்கை தேர்வு செய்தது. அணியின் இன்னிங்ஸை தொடங்கியோரில் எமி ஜோன்ஸ் 1, டேமி பியூமன்ட் 5 ரன்களுக்கு வெளியேற்றப்பட்டனர்.

3-ஆவது விக்கெட்டுக்கு இணைந்த எம்மா லேம்ப் - கேப்டன் நேட் சிவர் பிரன்ட் 71 ரன்கள் சேர்த்தனர். இதில் லேம்ப் 4 பவுண்டரிகளுடன் 39, பிரன்ட் 5 பவுண்டரிகளுடன் 41 ரன்களுக்கு பெவிலியன் திரும்பினர்.