வளர்த்த கிடாவே மார்பில் உதைத்துவிட்டது

அன்புமணி மீது ராமதாஸ் மனவருத்தம்

- 

விழுப்புரம், மே 29: 'வளர்த்த கிடாவே மார்பில் உதைத்துவிட்டது' என தன் மகனும் பாமக தலைவரான அன்புமணி மீது கட்சியின் நிறுவனர் மருத்துவர் ச.ராமதாஸ் வருத்தம் தெரிவித்தார்.

மேலும், அன்புமணி மீது அடுக்கடுக்கான குற்றச்சாட்டுகளையும் அவர் சுமத்தினார்.

பாட்டாளி மக்கள் கட்சியின் நிறுவனர் ராமதாஸின் மகள்வழிப் பேரனான முகுந்தன் பரசுராமன், 2024, டிசம்பர் 28-ஆம் தேதி புதுச்சேரியில் நடைபெற்ற கட்சியின் புத்தாண்டு பொதுக் குழுக் கூட்டத்தில் பாமக இளைஞர் சங்கத் தலைவராக நியமிக்கப்பட்டார்.

இந்த அறிவிப்பை ராமதாஸ் வெளியிட்டபோது, மேடையில் இருந்த அன்புமணி ராமதாஸ் அதற்கு எதிர்ப்புத் தெரிவித்தார்.

இளைஞர் சங்கத் தலைவராக முகுந்தன் நியமிக்கப்பட்டதுமுதல் ராமதாஸுக்கும், அன்புமணிக்கும் இடையே அரசியல்ரீதியாக கருத்து மோதல்கள் இருந்து வந்தன.

அன்புமணியை தலைவர் பதவியிலிருந்து நீக்கி செயல் தலைவராக அறிவித்த ராமதாஸ், பாமக தலைவராக தானே செயல்படப்போவதாக அறிவித்தார். அதன் பிறகு ராமதாஸ் நடத்திய கூட்டங்களை அன்புமணி தொடர்ந்து புறக்கணித்து வந்தார்.