தொழில்பேட்டை நிறுவனங்களில் ஆய்வு செய்ய வேண்டும்

அதிகாரிகளிடம் தி.வேல்முருகன் எம்எல்ஏ அறிவுறுத்தல்

- 

நெய்வேலி, மே 21: கடலூர் தொழில்பேட்டையில் செயல்படும் நிறுவனங்கள் முறையாக அனுமதி பெற்று இயங்குகிறதா என்பதை அனைத்துத் துறை அதிகாரிகள் கோட்டாட்சியர் தலைமையில் ஆய்வு செய்து அறிக்கை சமர்ப்பிக்க வேண்டும் என்று, தமிழ்நாடு சட்டப் பேரவை உறுதிமொழிக் குழுத் தலைவர் தி.வேல்முருகன் எம்எல்ஏ தெரிவித்தார்.

கடலூர் மாவட்டத்துக்கு தமிழ்நாடு சட்டப் பேரவை உறுதிமொழிக் குழுத் தலைவர் தி.வேல்முருகன் தலைமையில், உறுப்பினர்கள் எஸ். அரவிந்த் ரமேஷ் (சோழிங்கநல்லூர்), ரா.அருள் (சேலம்மேற்கு), மு.சக்கரபாணி (வானூர்), எம்.பூமிநாதன் (மதுரை தெற்கு), எஸ்.மாங்குடி (காரைக்குடி), எம்.கே.மோகன் (அண்ணாநகர்), எஸ்.ஜெயக்குமார் (பெருந்துறை) ஆகியோர் புதன்கிழமை வந்தனர்.

பின்னர், அவர்கள் கடலூர் புதுக்குப்பத்தில் கட்டப்படும் காவலர் குடியிருப்பு கட்டடம், கடலூர் தொழில்பேட்டை பகுதியில் இயங்கும் லாயல் ஃபேப்ரிக்ஸ் மற்றும் டாடா கெமிக்கல்ஸ் நிறுவனங்கள், விருத்தாசலம் அரசு மருத்துவ மனை, காடாம்புலியூர் பழங்குடியினர் சமுதாய நலக்கூடம் போன்ற இடங்களை பார்வையிட்டு ஆய்வு செய்தனர்.