அமெரிக்க பயணத்தை தவிர்த்தார் பிரதமர் மோடி

ஐ.நா. கூட்டத்தில் பங்கேற்பில்லை

- 

நியூயார்க், செப். 6: அமெரிக்காவில் இம்மாதம் நடைபெறும் ஐ.நா. பொதுச்சபை உயர்நிலை கூட்டத்தில் பிரதமர் நரேந்திர மோடிக்கு பதிலாக வெளியுறவு அமைச்சர் எஸ்.ஜெய்சங்கர் பங்கேற்று உரை யாற்றுவார் என்று தெரிவிக்கப்பட்டுள்ளது. அமெரிக்காவுடன் வர்த்தக பதற்றம் நிலவிவரும் சூழலில், அந்நாட்டுக்கான பயணத்தை பிரதமர் மோடி தவிர்த்துள்ளார்.

உலக அளவில் அதிகபட்சமாக இந்தியப் பொருள்கள் மீது 50 சதவீத இறக்குமதி வரியை அமெரிக்க அதிபர் டிரம்ப் விதித்துள்ளார். தங்களின் எதிர்ப்பையும் மீறி ரஷியாவில் இருந்து தொடர்ந்து கச்சா எண்ணெய் கொள்முதல் செய்வதால் இந்தியா மீது அதிக வரி விதிக்கப்பட்டுள்ளதாக அமெரிக்கா தெரிவித்தது. அதேநேரம், ரஷியாவிடம் இருந்து அதிக கச்சா எண்ணெய் இறக்குமதி செய்யும் மற்றொரு நாடான சீனா மீதான 30 சதவீத வரியை டிரம்ப் நிறுத்திவைத்தார். எனவே, இந்தியாவுடன் தங்களுக்கு சாதகமான வர்த்தக ஒப்பந்தத்தை இறுதி செய்ய அமெரிக்கா அளிக்கும் நெருக்கடியாகவே இந்த வரி விதிப்பு பார்க்கப்படுகிறது.

இந்தியா-பாகிஸ்தான் இடையிலான சமீபத்திய மோதலில் தான் தலையிட்டு, சண்டை நிறுத்தம் ஏற்படுத்தியதாக டிரம்ப் தெரிவித்த கருத்துகளும், இந்திய-அமெரிக்க உறவில் பின்னடைவை ஏற்படுத்தின.