தன்னுடல் தாக்கு நோய்... தற்காக்கும் புதிய சிகிச்சை...

பெருந்தொற்றிலிருந்து மீண்டு வந்தாலும், பல லட்சக்கணக்கானோருக்கு இன்னல்களும் அதன் எதிர்விளைவுகள் தொடர்கின்றன. கரோனா நோயாளிகளின் உடலில் சைட்டோகைன் எனப்படும் புரதம், அளவுக்கு அதிகமாக சுரந்து தன்னுடல் தாக்கு நோயாக (ஆட்டோ இம்யூன் டிஸீஸ்) உருவெடுத்ததுதான் அதற்கு காரணம் என மருத்துவர்கள் தெரிவிக்கின்றனர். அத்தகைய பாதிப்புகளை பீட்டா குளூக்கோன் என்ற நார்ச்சத்து உணவு தடுப்பதாக தமிழக மருத்துவர்களும், ஜப்பானிய நிபுணர்களும் ஆய்வு மூலம் உறுதிப்படுத்தியுள்ளனர்.

- ஆ.கோபிகிருஷ்ணா

மருத்துவப் பல்கலை. ஆய்வு இத்தகைய பாதிப்பிலிருந்து நோயாளிகளை மீட்டெடுக்கும் நோக்கில் தமிழ்நாடு டாக்டர் எம்ஜிஆர் மருத்துவப் பல்கலைக்கழகத்தின் துணைவேந்தராக டாக்டர் சுதா சேஷய்யன் இருந்தபோது ஆய்வு ஒன்று முன்னெடுக்கப்பட்டது. ஜப்பானிய ஆய்வாளர்களுடன் இணைந்து மேற்கொள்ளப்பட்ட அந்த ஆய்வினை, சென்னை மருத்துவக் கல்லூரி முன்னாள் முதல்வர் டாக்டர் எ.தேரணிராஜன், பல்கலைக்கழக நோய் எதிர்ப்பியல் துறை பேராசிரியர் டாக்டர் புஷ்கலா, நரம்பியல் சிகிச்சை நிபுணர் ராகவன், ஜப்பானைச்சேர்ந்த மருத்துவ அறிவியலாளர் நோபுனாவோ இகேவாக்கி, மருத்துவர் சாமுவேல் ஆபிரகாம் உள்ளிட்டோர் மேற்கொண்டனர்.