தமிழகத்தில் சாகர்மாலா திட்டப் பணிகளுக்கு விரைவாக நிதியுதவி

மத்திய அமைச்சரிடம் எ.வ.வேலு வலியுறுத்தல்

- நமது நிருபர்

புது தில்லி, ஆக. 11: தமிழகத்தில் சாகர்மாலா திட்டப் பணிகளுக்கு விரைவாக நிதியுதவி வழங்குமாறு தில்லியில் மத்திய கப்பல் போக்குவரத்துத் துறை அமைச்சர் சர்வானந்த சோனோவாலிடம் தமிழக பொதுப் பணித் துறை மற்றும் சிறு துறைமுகங்கள் துறை அமைச்சர் எ.வ.வேலு வலியுறுத்தினார்.

இது குறித்து தமிழக அரசு திங்கள்கிழமை வெளியிட்டுள்ள செய்திக்குறிப்பில் கூறியிருப்பதாவது:

ராமேசுவரம் துறைமுகத்தில் ரூ.118 கோடி திட்டச் செலவில், 250 மீட்டர் நீளமுள்ள அணுகுதோணித்துறை, சர்வதேச பயணிகள் முனையம் போன்ற உள்கட்டமைப்புகளை மேம்படுத்துவதற்கான விரிவான திட்ட அறிக்கையை சென்னை இந்திய தொழில்நுட்பக் கழகத்தில் (ஐஐடி) உள்ள துறைமுகங்கள், நீர்வழிகள் மற்றும் கடற்கரைகளுக்கான தேசிய தொழில்நுட்ப மையம் தயாரித்துள்ளது.

இதன்மூலம் ராமேசுவரம் (இந்தியா) முதல் தலைமன்னார் (இலங்கை) இடையிலான 26 கடல் மைல் (48 கி.மீ.) தொலைவுக்கு சர்வதேச பயணிகள் கப்பல் போக்குவரத்தைத் தொடங்க முடியும்.