கொல்கத்தா பெண் மருத்துவர் படுகொலை: ஓராண்டு நிறைவு பேரணியில் காவல் துறை தடியடி

மேற்கு வங்க மாநிலம், கொல்கத்தாவில் பெண் மருத்துவர் படுகொலை செய்யப்பட்ட சம்பவத்தின் ஓராண்டு நிறைவையொட்டி, சனிக்கிழமை நடைபெற்ற பேரணியின்போது காவல் துறையினர் தடியடி நடத்தியதால் பரபரப்பு ஏற்பட்டது.

- 

கொல்கத்தா, ஆக. 9:

கடந்த ஆண்டு ஆகஸ்ட் 9-ஆம் தேதி கொல்கத்தாவில் உள்ள மாநில அரசு மருத்துவக் கல்லூரி மருத்துவமனையில் பெண் பயிற்சி மருத்துவர் ஒருவர் பாலியல் வன் கொடுமை செய்து படுகொலை செய்யப்பட்டார்.

இந்த சம்பவத்தின் முதலாம் ஆண்டு நிறைவையொட்டி, ஹௌராவில் உள்ள மாநில தலைமைச் செயலகத்தை நோக்கிப் பேரணியாகச் செல்ல கொல்லப்பட்ட பெண் மருத்துவரின் பெற்றோர் அழைப்பு விடுத்திருந்தனர். இதில் பொதுமக்கள் திரளாகக் கலந்து கொள்ளுமாறு வேண்டுகோள் விடுத்திருந்தனர். இதையடுத்து தேசியக்கொடி, பதாகைகள் உள்ளிட்டவற்றை ஏந்தியபடி ஆயிரக்கணக்கானோர் சனிக்கிழமை பேரணியாகச் சென்றனர்.

பேரணியில் மாநில சட்டப் பேரவை எதிர்க்கட்சித் தலைவரும் பாஜகவைச் சேர்ந்தவருமான சுவேந்து அதிகாரி மற்றும் சில பாஜக எம்எல்ஏக்கள் பங்கேற்றனர்.

'அபயாவுக்கு நீதி கிடைக்கட்டும்' என்று கோஷமிட்டபடி அவர்கள் பேரணியாகச் சென்றனர்.