பயங்கரவாத எதிர்ப்பில் ஒத்துழைப்பு: லாத்வியா உறுதி

'ஆபரேஷன் சிந்தூர்' வெற்றிகர நடவடிக்கைக்குப் பிறகான இந்தியாவின் ராஜீய அணுகுமுறையின் ஒரு பகுதியாக, லாத்வியா வெளியுறவுத் துறை மூத்த அதிகாரி ஆன்டஜெஸ் விலும்சன் ஸுடன் திமுக எம்.பி. கனிமொழி தலைமையிலான இந்திய அனைத்துக் கட்சிக் குழுவினர் சந்தித்துப் பேசினர்.

- 

ரிகா, மே 31:

அப்போது, பஹல்காம் தாக்குதல் மற்றும் அனைத்து வடிவிலான பயங்கரவாதத்துக்கு எதிராகக் கண்டனத்தைப் பதிவு செய்த லாத்வியா, இந்திய-பசிபிக் பிராந்தியத்தில் முக்கிய நாடான இந்தியாவுடன் இணைந்து பணியாற்ற விரும்புவதாகத் தெரிவித்தது.

பஹல்காமில் பயங்கரவாதத் தாக்குதலுக்குப் பதிலடியாக, பாகிஸ்தான் மற்றும் பாகிஸ்தான் ஆக்கிரமிப்பு காஷ்மீரில் கடந்த மே 7-ஆம் தேதி இந்திய ராணுவம் ஏவுகணைத் தாக்குதலை நடத்தி (ஆபரேஷன் சிந்தூர்), பயங்கரவாத உள்கட்டமைப்புகளை அழித்தது. பின்னர், இரு நாடுகளுக்கும் இடையே 4 நாள்களுக்கு ராணுவ மோதல் ஏற்பட்டு, பாகிஸ்தானின் கோரிக்கையின்பேரில் சண்டை நிறுத்தப்பட்டது.