தொடர் சரிவுப் பாதையில் பங்குச் சந்தை!

உயர்ந்து வரும் கச்சா எண்ணெய் விலை மற்றும் நீடிக்கும் மத்திய கிழக்கு போர் பதற்றம் காரணமாக, இந்த வாரத்தின் 2-ஆம் வர்த்தக தினமான செவ்வாய்க்கிழமை இந்தியப் பங்குச் சந்தை மீண்டும் பலத்த சரிவைச் சந்தித்தது.

- 

இதைத் தொடர்ந்து, மும்பை பங்குச் சந்தைக் குறியீடான சென்செக்ஸ், தேசிய பங்குச் சந்தைக் குறியீடான நிஃப்டி ஆகிய இரண்டும் சுமார் 2 சதவீதம் சரிவைச் சந்தித்தன.

உலகளாவிய சந்தைகளில் நிலவிய பலவீனமான போக்கு, அந்நிய முதலீடுகள் தொடர்ந்து வெளியேற்றம் மற்றும் அமெரிக்க டாலருக்கு நிகரான இந்திய ரூபாயின் மதிப்பு ரூ.95.74 என வரலாறு காணாத வீழ்ச்சியைச் சந்தித்தது போன்றவை முதலீட்டாளர்களின் உணர்வை வெகுவாகப் பாதித்தன. இதனால், சந்தை அதிகம் விற்பனையை எதிர்கொண்டது. குறிப்பாக, ஐ.டி., ரியால்டி துறை பங்குகள் பெரும் சரிவைச் சந்தித்தன.