விமானக் கட்டணத்துக்கு உச்ச வரம்பு

மத்திய அரசு நிர்ணயம்

- 

விமானங்களுக்கான பயணக் கட்டணத்துக்கு மத்திய அரசு சனிக்கிழமை உச்சவரம்பு நிர்ணயித்தது.

நாட்டின் பல்வேறு நகரங்களில் கடந்த 5 நாள்களாக இண்டிகோ விமானங்கள் ரத்து செய்யப்படுவதால், பிற நிறுவனங்கள் விமானக் கட்டணத்தை பல மடங்கு உயர்த்தின. இதைத் தடுக்கும் நோக்கில் மத்திய அரசு இந்த நடவடிக்கையை மேற்கொண்டது.

கடந்த வியாழக்கிழமை 550 விமானங்கள், வெள்ளிக்கிழமை 1,000-க்கும் மேற்பட்ட இண்டிகோ விமானங்கள் ரத்து செய்யப்பட்ட நிலையில், ஐந்தாவது நாளாக சனிக்கிழமை நாட்டின் முக்கிய நகரங்களில் இருந்து இயக்கப்படும் 1600-க்கும் மேற்பட்ட விமானங்கள் ரத்து செய்யப்பட்டன.

விமானிகளின் பணிச் சுமையைக் குறைக்க, கடந்த நவம்பர் 1-ஆம் தேதிமுதல் விமானிகளுக்கான திருத்தப்பட்ட பணி நேரக் கட்டுப்பாட்டு விதிகள் (எஃப்டிடிஎல்) அமலுக்கு வந்தன. இந்த விதிகளின்படி, வாராந்திர ஓய்வையும் வருடாந்திர விடுமுறைகளையும் தனித்தனியாகக் கருத வேண்டும். அதாவது, வாராந்திர 48 மணி நேர ஓய்வுக்குப் பதிலாக விடுமுறையை ஈடு செய்யக் கூடாது.

இந்த விதிமுறை மாற்றங்களுக்கு இண்டிகோ போதிய திட்டமிடாததால், அந்த நிறுவனத்தில் விமானிகள் பற்றாக்குறை ஏற்பட்டு, கடந்த சில நாள்களாக அன்றாட விமான சேவைகள் பாதிக்கப்பட்டுள்ளன.