திமுக ஆட்சியில் தமிழகம் போராட்டக் களமாக மாறியுள்ளது

முதல்வர் மு.க. ஸ்டாலின் தலைமையிலான திமுக ஆட்சியில் தமிழகம் போராட்டக் களமாக மாறியுள்ளது என முன்னாள் முதல்வர் எடப்பாடி கே. பழனிசாமி குற்றஞ்சாட்டினார்.

- 

சாத்தூர்/விருதுநகர், ஆக. 8:

மக்களைக் காப்போம், தமிழகத்தை மீட்போம்' என்ற எழுச்சிப் பயணம் மேற்கொண்டுள்ள எடப்பாடி பழனிசாமி விருதுநகர் மாவட்டம், சாத்தூர் முக்குராந்தல் பகுதியில் வெள்ளிக்கிழமை மாலை பேசியதாவது:

முதல்வர் மு.க. ஸ்டாலினின் ஆட்சியில் மக்கள் தொடர்ந்து போராடிக்கொண்டிருப்பதைப் பார்க்க முடிகிறது. ஆசிரியர்கள், விவசாயிகள், போக்குவரத்துத் தொழிலாளர்கள் என அனைத்துத் தரப்பு மக்களும் போராடும் போராட்டக் களமாக தமிழகம் மாறியுள்ளது. இதைப் பற்றியெல்லாம் ஸ்டாலின் கவலைப்படாமல் அவரது வீட்டில் உள்ளவர்களுக்கு பதவி வேண்டும்; அதிகாரம் வேண்டும் என்பதில் மட்டுமே கவனம் செலுத்தி வருகிறார். சிறந்த முதல்வர் எனக் கூறும் அவர், கடன் வாங்குவதில் மட்டுமே சிறந்தவராகத் திகழ்கிறார்.

தொழிலாளர்கள் நாள் ஒன்றுக்கு ரூ. 700 வரை வருவாய் ஈட்டிய வந்தனர். ஆனால், தற்போது திமுக ஆட்சியில் வெறும் ரூ. 150 முதல் ரூ. 200 மட்டுமே கிடைப்பதாகக் கூறுகின்றனர். நாட்டு மக்கள் எந்தளவுக்கு துன்பப்படுகின்றனர், வேதனைக்குள்ளாகி வருகின்றனர் என்பதை அறிந்து முதல்வர் மு.க.ஸ்டாலின் பேச வேண்டும்.