முல்லைப் பெரியாறு விவகாரம் அணைப் பகுதியில் மரங்களை வெட்ட சுற்றுச்சூழல் அனுமதி வழங்க மத்திய அரசுக்கு உத்தரவு

முல்லைப் பெரியாறு அணைப் பகுதியில் பராமரிப்புப் பணியை மேற்கொள்ளும் விவகாரத்தில் மரங்களை வெட்டுவதற்கான தடையின்மைச் சான்றிதழை (என்ஓசி) கேரள அரசு அளித்திருப்பதாகத் தெரிவிக்கப்பட்டதால், இதை சரிபார்த்து சுற்றுச்சூழல் அனுமதியை நான்கு வாரங்களில் அளிக்குமாறு மத்திய அரசின் சுற்றுச்சூழல் அமைச்சகத்துக்கு உச்சநீதிமன்றம் வியாழக்கிழமை உத்தரவிட்டது.

- நமது நிருபர்

புது தில்லி, ஜூலை 31:

முல்லைப் பெரியாறு அணையின் உரிமைகள் தொடர்பாக தமிழக அரசு தொடர்ந்த வழக்கில், உச்சநீதிமன்றம் 2006 மற்றும் 2014-இல் அளித்த தீர்ப்பை செயல்படுத்த அனுமதிக்காமல் கேரள அரசு முட்டுக் கட்டை போட்டு வருவதாகக் கூறி தமிழக அரசு தரப்பில் உச்சநீதிமன்றத்தில் முறையீட்டு மனுக்கள் தாக்கல் செய்யப்பட்டன.

அணையின் பாதுகாப்பை மதிப்பிடுவதற்கு உச்சநீதிமன்ற உத்தரவின் பேரில் மேற்பார்வைக் குழு அமைக்கப்பட்டுள்ளது. இந்த நிலையில், அணையைப் பராமரிப்பது தொடர்பான விவகாரத்தில் மரங்களை வெட்டுவதற்கான அனுமதி, அணையைப் பழுதுபார்த்தல், அணுகுசாலை அமைத்தல் உள்ளிட்ட பிரச்னைகள் தீர்க்கப்படாமல் இருப்பதாக தமிழக அரசுத் தரப்பில் உச்சநீதிமன்றத்தில் முறையிடப்பட்டது.