அறிவியலில் புதிய சக்தியுடன் முன்னேறும் இந்தியா

தற்போதைய 21-ஆம் நூற்றாண்டில், அறிவியல் துறையில் புதிய சக்தியுடன் இந்தியா முன்னேறுகிறது என்று பிரதமர் நரேந்திர மோடி பெருமிதத்துடன் குறிப்பிட்டார்.

- 

புது தில்லி, ஜூலை 27:

மேலும், விண்வெளித் துறை மீது இந்தியச் சிறார்கள் மத்தியில் புதிய ஆர்வம் ஏற்பட்டுள்ளதாகவும் அவர் தெரிவித்தார்.

பிரதமர் மோடி ஒவ்வொரு மாதமும் கடைசி ஞாயிற்றுக்கிழமையில் 'மனதின் குரல்' (மன் கி பாத்) வானொலி நிகழ்ச்சி வாயிலாக நாட்டு மக்களுக்கு உரையாற்றி வருகிறார். 124-ஆவது மனதின் குரல் நிகழ்ச்சி, ஞாயிற்றுக்கிழமை (ஜூலை 27) ஒலிபரப்பானது.

அதில், அவர் கூறியிருப்பதாவது: அறிவியல், விண்வெளி, கலாசாரம் போன்ற துறைகளில் ஒவ்வொரு இந்தியரும் பெருமைப்படக் கூடிய சாதனைகள், கடந்த சில வாரங்களில் நிகழ்ந்துள்ளன. அண்மையில் இந்திய வீரர் சுபான்ஷு சுக்லா தனது விண்வெளிப் பயணத்தை வெற்றிகரமாக நிறைவு செய்தார்.

அவர் பூமிக்குத் திரும்பியபோது, ஒட்டுமொத்த தேசமும் பெருமிதத்தில் பொங்கியது. கடந்த 2023, ஆகஸ்டில் சந்திரயான்-3 நிலவில் வெற்றிகரமாகத் தரையிறங்கிய போதும், இதேபோன்ற உற்சாகம் நிலவியது.

இப்போது அறிவியல், விண்வெளித் துறை மீது இந்தியச் சிறார்கள் மனதில் புதிய ஆர்வம் துளிர்த்துள்ளது. 'நாமும் விண்வெளிக்குப் பயணிப்போம்; நிலவில் கால் பதிப்போம்; விண்வெளி விஞ்ஞானியாக உருவெடுப்போம்' என்று அவர்கள் நம்பிக்கையுடன் கூறுகின்றனர்.

நாட்டின் விண்வெளித் துறையில் 5 ஆண்டுகளுக்கு முன் 50-க்கும் குறைவான புத்தாக்க (ஸ்டார்ட் அப்) நிறுவனங்களே இருந்தன. இப்போது 200-க்கும் மேற்பட்ட புத்தாக்க நிறுவனங்கள் உள்ளன.

ஆகஸ்ட் 23-ஆம் தேதி தேசிய விண்வெளி தினம் கடைப்பிடிக்கப்பட உள்ளது.