பூமிக்குத் திரும்பினார் இந்திய வீரர் சுபான்ஷு சுக்லா

20 நாள்கள் விண்வெளிப் பயணம் வெற்றி

- 

புது தில்லி, ஜூலை 15: சர்வதேச விண்வெளிநிலையத்தில் (ஐஎஸ்எஸ்) இருந்து இந்தியாவின் சுபான்ஷு சுக்லா உள்ளிட்ட 3 வீரர்கள் மற்றும் ஒரு வீரங்கனை 'டிராகன் கிரேஸ்' விண்கலத்தில் பாதுகாப்பாக பூமிக்கு திரும்பினர்.

அமெரிக்காவின் தெற்கு கலிஃபோர்னியாவில் சான்டியாகோ கடல் பரப்பில் இந்திய நேரப்படி செவ்வாய்க்கிழமை பிற்பகல் 3 மணியளவில் பாராசூட்டுகள் உதவியுடன் விண்கலம் பாதுகாப்பாக இறங்கியது. பின்னர், படகுகள் மூலம் மீட்புக் கப்பலுக்கு விண்கலம் எடுத்து வரப்பட்டது.

விண்கலத்தில் இருந்து பணியாளர்கள் உதவியோடு வெளியே வந்த சுக்லா உள்பட நான்கு பேரும் 20 நாட்களுக்குப் பின் பூமிக் காற்றை சுவாசித்தனர்; கேமராவை பார்த்து, புன்னகையுடன் கையசைத்தனர். பாதுகாப்பாக பூமிக்கு திரும்பியதன் மூலம் ஆக்ஸியம்-4 திட்டத்தின்கீழ் நால்வரின் விண்வெளிப் பயணம் வெற்றிகரமாக நிறைவடைந்துள்ளது.