ஜாதிய வலையில் பிகார் அரசியல்!

வருமாதம் சட்டப்பேரவைத் தேர்தலுக்கு ஆயத்தமாகி வருகிறது பிகார் மாநிலம். எதிர்பார்ப்புகள் மற்றும் ஓயாத சிக்கல்கள் என இம்முறையும் இங்கு தேர்தலுக்கு ஐந்து மாதங்களுக்கு முன்பே பதற்றம் பரவிக் கிடப்பதை தில்லித் தலைவர்களின் இடைவிடாத தேர்தல் முன்னோட்ட பொதுக்கூட்டப் பங்கேற்புகளால் அறிய முடிகிறது.

- ம.ஆ. பரணிதரன்

வரும் மாதம் சட்டப்பேரவைத் தேர்தலுக்கு ஆயத்தமாகி வருகிறது பிகார் மாநிலம். எதிர்பார்ப்புகள் மற்றும் ஓயாத சிக்கல்கள் என இம்முறையும் இங்கு தேர்தலுக்கு ஐந்து மாதங்களுக்கு முன்பே பதற்றம் பரவிக் கிடப்பதை தில்லித் தலைவர்களின் இடைவிடாத தேர்தல் முன்னோட்ட பொதுக்கூட்டப் பங்கேற்புகளால் அறிய முடிகிறது.

13.07 கோடி மக்கள்தொகை மற்றும் ஜாதி அடிப்படையிலான அரசியல் வரலாற்றைக் கொண்ட பிகார், தேசிய மற்றும் மாநிலக் கட்சிகளுக்கு ஒரு முக்கியமான போர்க்களமாகத் திகழ்கிறது. நிதீஷ் குமாரின் ஐக்கிய ஜனதா தளம் (ஜேடியு) மற்றும் பாஜக தலைமையிலான ஆளும் தேசிய ஜனநாயகக் கூட்டணி (என்டிஏ) ஒருபுறமும் ராஷ்ட்ரீய ஜனதா தளம் (ஆர்ஜேடி) தலைமையிலான 'மகா கூட்டணி' மறுபுறமும் களத்தில் வியூகங்களை வகுத்து வருகின்றன.

பல மாநிலங்களில் பல்வேறு கட்சிகளின் வெற்றிக்கு வியூகம் வகுத்த பிரசாந்த் கிஷோர், சொந்த மண்ணில் சொந்தக் கட்சி கண்டு பல முறை தோற்றாலும் துவளாதவராக இங்கு தேர்தல் களத்தில் 'ஜன் சுராஜ்' கட்சியின் முகமாகக் களமிறங்குகிறார்.