கொல்கத்தா 'த்ரில்' வெற்றி

ஐபிஎல் கிரிக்கெட் போட்டியின் 53-ஆவது ஆட்டத்தில் நடப்பு சாம்பியன் கொல்கத்தா நைட் ரைடர்ஸ் 1 ரன் வித்தியாசத்தில் ராஜஸ்தான் ராயல்ஸை ஞாயிற்றுக்கிழமை 'த்ரில்' வெற்றி கண்டது.

- 

கொல்கத்தா, மே 4: ஐபிஎல் கிரிக்கெட் போட்டியின் 53-ஆவது ஆட்டத்தில் நடப்பு சாம்பியன் கொல்கத்தா நைட் ரைடர்ஸ் 1 ரன் வித்தியாசத்தில் ராஜஸ்தான் ராயல்ஸை ஞாயிற்றுக்கிழமை 'த்ரில்' வெற்றி கண்டது. இதன் மூலமாக பிளே-ஆஃப் போட்டியில் அந்த அணி தன்னை தக்கவைத்துக் கொண்டது.

இந்த ஆட்டத்தில் முதலில் கொல்கத்தா 20 ஓவர்களில் 4 விக்கெட்டுகள் இழப்புக்கு 206 ரன்கள் சேர்க்க, ராஜஸ்தான் 20 ஓவர்களில் 8 விக்கெட்டுகள் இழப்புக்கு 205 ரன்களே எடுத்தது.

முன்னதாக டாஸ் வென்ற கொல்கத்தா, பேட்டிங்கை தேர்வு செய்தது. அந்த அணியின் இன்னிங்ஸை தொடங்கியோரில் சுனில் நரைன் 1 பவுண்டரி, 1 சிக்ஸருடன் 11 ரன்களுக்கு வெளியேறினார். அப்போது ரஹ்மானுல்லா குர்பாஸுடன் இணைந்தார் கேப்டன் அஜிங்க்ய ரஹானே.

இந்த ஜோடி 2-ஆவது விக்கெட்டுக்கு 56 ரன்கள் சேர்த்த நிலையில், குர்பாஸ் 4 பவுண்டரிகள், 1 சிக்ஸருடன் 35 ரன்களுக்கு ஆட்டமிழந்தார். தொடர்ந்து அங்கிரிஷ் ரகுவன்ஷி களம் புக, ரஹானேவுடனான அவரின் 3-ஆவது விக்கெட் பார்ட்னர்ஷிப்புக்கு 42 ரன்கள் கிடைத்தது.

இந்நிலையில் ரஹானே 1 பவுண்டரி, 2 சிக்ஸர்களுடன் 30 ரன்களுக்கு பெவிலியன் திரும்ப, 5-ஆவது பேட்டராக ஆண்ட்ரே ரஸ்ஸெல் வந்தார். ரகுவன்ஷி - ரஸ்ஸெல் இணை 4-ஆவது விக்கெட்டுக்கு 61 ரன்கள் சேர்த்தது. இதில் ரகுவன்ஷி 5 பவுண்டரிகளுடன் 44 ரன்களுக்கு பெவிலியன் திரும்பினார்.