பிரயாக்ராஜ் மார்கழி மேளா தொடக்கம்

லட்சக்கணக்கான பக்தர்கள் புனித நீராடல்

- 

உத்தர பிரதேச மாநிலம், பிரயாக்ராஜில் உள்ள திரிவேணி சங்கமத்தில், பௌர்ணமி தினமான சனிக்கிழமை மார்கழி மேளா திருவிழா கோலாகலமாகத் தொடங்கியது. கடும் குளிரையும் பொருள்படுத்தாமல், லட்சக்கணக்கான பக்தர்கள் புனித நீராடினர்.

இந்த ஆன்மிக திருவிழா வரும் பிப்ரவரி 15-ஆம் தேதி வரை தொடர்ந்து நடைபெற உள்ளது. பௌர்ணமி தினமான சனிக்கிழமை அதிகாலை முதலே பக்தர்கள் கூட்டம் அலைமோதியது. எங்கு பார்த்தாலும் காவிக்கொடிகள் பறக்க, பக்தி முழக்கங்களுக்கு இடையே பக்தர்கள் புனித நீராடினர். துறவிகள், தற்காலிக கூடாரங்களில் தங்கியிருக்கும் கல்பவாசிகள் மற்றும் பூஜைப்பொருள் வியாபாரிகள் என திரிவேணி சங்கமம் பகுதியே விழாக்கோலம் பூண்டுள்ளது.