சின்ன வெங்காயம் விலை வீழ்ச்சி, விவசாயிகள் கவலை

சின்ன வெங்காயத்தின் கொள்முதல் விலை வீழ்ச்சியடைந்துள்ளதால் விவசாயிகள் கவலையடைந்துள்ளனர்.

- நமது நிருபர்

பெரம்பலூர், செப்.1: வாழ்வாதாரத்தைப் பாதுகாக்க குறைந்தபட்ச ஆதார விலை நிர்ணயிக்க வேண்டுமென தமிழக அரசுக்குக் கோரிக்கை விடுத்துள்ளனர்.

சின்ன வெங்காயம் உற்பத்தியில், பெரம்பலூர் மாவட்டம் மாநிலத்திலேயே முதலிடத்தில் உள்ளது. தற்போது பாசனநீர் அடிப்படையில் ஆண்டு முழுதும் சாகுபடி செய்து வருகின்றனர் இம் மாவட்டத்தைச் சேர்ந்த விவசாயிகள். கரும்பு, பருத்தி மற்றும் மக்காச்சோளத்துக்கு அடுத்ததாக பிரதானப் பணப்பயிராகக் கருதப்படும் சின்ன வெங்காயம், பெரம்பலூர் மாவட்டத்தில் உற்பத்தி செய்யப்படும் உணவுப் பொருள்களின் வரிசையில் முக்கியத்துவம் வாய்ந்ததாகக் கருதப்படுகிறது.

இம் மாவட்டத்தில் செட்டிக்குளம், பாடாலூர் உள்ளிட்ட சுமார் 50-க்கும் மேற்பட்ட கிராமங்களில் உற்பத்தியாகும் சின்ன வெங்காயம், அதிக காரத்தன்மை மற்றும் முளைப்புத் திறனுடன், மருத்துவ குணம் நிறைந்ததாக இருப்பதுடன், சுமார் ஓராண்டு காலம் வரை பட்டறைகளில் இருப்பு வைக்கும் தரம் மிகுந்ததாக உள்ளது. இதன் காரணமாக தமிழகம் மட்டுமின்றி, கேரளா, கர்நாடகா, ஆந்திரா உள்ளிட்ட அண்டை மாநிலத்தவரும் இங்குள்ள வெங்காயத்தை விதைக்காகத் தேர்வு செய்து வாங்கிச் செல்கின்றனர்.