தேரூர் பேரூராட்சித் தலைவி ஜாதி சான்றிதழ் விவகாரம்: தனி நீதிபதி உத்தரவை உறுதி செய்தது உயர்நீதிமன்றம்

கன்னியாகுமரி மாவட்டம், தேரூர் பேரூராட்சித் தலைவியின் ஜாதி சான்றிதழை ரத்து செய்து தனி நீதிபதி பிறப்பித்த உத்தரவை உறுதி செய்து சென்னை உயர்நீதிமன்ற மதுரை அமர்வு அண்மையில் உத்தரவிட்டது.

- 

மதுரை, ஆக. 30:

கன்னியாகுமரி மாவட்டம், தேரூர் பேரூராட்சி உறுப்பினர் அய்யப்பன் சென்னை உயர்நீதிமன்ற மதுரை அமர்வில் தாக்கல் செய்த மனு:

கடந்த 2022-ஆம் ஆண்டு நடைபெற்ற உள்ளாட்சித் தேர்தலில் தேரூர் பேரூராட்சி எட்டாவது வார்டில் திமுக சார்பில் போட்டியிட்டு வெற்றி பெற்றேன். இதே பேரூராட்சியில் வார்டு எண் 2-இல் பெண்கள் பொது வார்டில் அதிமுக சார்பில் அமுதாராணி போட்டியிட்டு வெற்றி பெற்றார். தேரூர் பேரூராட்சித் தலைவர் பதவி பட்டியல் சமுதாயத்தினருக்கு ஒதுக்கப்பட்டிருந்தது.

ஆனால், இந்துவான அமுதாராணி கடந்த 2005-இல் கிறிஸ்தவராக மதம் மாறி அந்த முறைப்படி திருமணம் செய்தார்.

ஆனால், இதை மறைத்து தன்னுடைய பிறப்புச் சான்றிதழை சமர்ப்பித்து பேரூராட்சித் தலைவர் பதவிக்கு அவர்தேர்ந்தெடுக்கப்பட்டார். பட்டியல் சமூகத்தைச் சேர்ந்த ஒருவர் வேறு மதத்துக்கு மாறியவுடன், அவர் பட்டியல் சமூகத்தவருக்கான இடஒதுக்கீட்டின் கீழ் பலனைப் பெற முடியாது.