பழைய ஓய்வூதியத் திட்டத்தை மீண்டும் அமல்படுத்தும் திட்டமில்லை

'தேசிய ஓய்வூதிய திட்டத்தின் கீழ் (என்பிஎஸ்) பலனடைந்து வரும் மத்திய அரசு ஊழியர்களுக்கு மீண்டும் பழைய ஓய்வூதியத் திட்டத்தை அறிமுகப்படுத்தும் திட்டமில்லை' என நிதியமைச்சர் நிர்மலா சீதாராமன் திங்கள்கிழமை தெரிவித்தார்.

- நிர்மலா சீதாராமன்

புது தில்லி, ஆக.11:

அரசின் கருவூலத்துக்கு அதிக நிதிச் சுமையை ஏற்படுத்தியதால் பழைய ஓய்வூதியத் திட்டத்தை அரசு நிறுத்தியதாகவும் அவர் தெரிவித்தார்.

2004, ஜன.1 அல்லது அதற்குப் பின் ஆயுதப் படைகளைத் தவிர பிற மத்திய அரசுப் பணிகளில் சேர்ந்தோருக்கு ஓய்வூதியம் வழங்கும் நோக்கில் என்பிஎஸ் அறிமுகப்படுத்தப்பட்டது.

இதுதவிர ஒருங்கிணைந்த ஓய்வூதியத் திட்ட (யுபிஎஸ்) அறிவிக்கையை கடந்த ஜனவரி மாதம் நிதியமைச்சகம் வெளியிட்டது. 25 ஆண்டுகாலம் அரசுப் பணியை நிறைவுசெய்தவர்கள் இத்திட்டத்தில் இணையத் தகுதிபெற்றவர்களாவர். பணிஓய்வுக்கு முந்தைய 12 மாதங்களில் அவர்கள் பெற்ற ஊதியத்தின் சராசரி கணக்கிடப்பட்டு அதில் 50 சதவீதம் வழங்கப்படுவதை இந்த திட்டம் உறுதிசெய்கிறது.

என்பிஎஸ் திட்டத்தின் கீழ் பலனடைந்து வரும் மத்திய அரசு ஊழியர்கள் யுபிஎஸ் திட்டத்தில் சேரலாம். இந்த இரு திட்டங்களில் ஏதேனும் ஒன்றை மத்திய அரசு ஊழியர்கள் தேர்ந்தெடுக்க வேண்டும்.