வேகமாக வளர்கிறது இந்திய பொருளாதாரம்

உலகின் மூன்றாவது பெரிய பொருளாதாரமாக உருவெடுப்பதை நோக்கி வேகமாகப் பயணிக்கிறது இந்தியா என்று பிரதமர் நரேந்திர மோடி பெருமிதத்துடன் தெரிவித்தார்.

- பிரதமர் மோடி

பெங்களூரு, ஆக. 10:

இந்தியாவை செயல்படாத பொருளாதாரம் என்று அமெரிக்க அதிபர் டொனால்ட் டிரம்ப் அண்மையில் விமர்சித்த நிலையில், பிரதமர் மோடி அவருக்கு மீண்டும் மறைமுகமாக பதிலடி கொடுத்துள்ளார்.

பெங்களூரு ஐஐடி (சர்வதேச தகவல் தொழில்நுட்ப மையம்) வளாகத்தில் ஞாயிற்றுக்கிழமை நடைபெற்ற விழாவில் மூன்றாம் கட்ட மெட்ரோ ரயில் திட்டத்தின் மஞ்சள் வழித்தடம், மூன்று வந்தே பாரத் விரைவு ரயில் சேவைகளை நாட்டுக்கு அர்ப்பணித்து, ரூ.15,600 கோடி மதிப்பிலான நான்காம் கட்ட மெட்ரோ ரயில் திட்டப் பணிகளுக்கு அடிக்கல் நாட்டி பிரதமர் மோடி பேசியதாவது:

கடந்த 11 ஆண்டுகளில் இந்தியாவின் பொருளாதாரம், உலக அளவில் 10-ஆவது இடத்தில் இருந்து முதல் 5 இடங்களுக்குள் முன்னேறியுள்ளது. உலகின் மூன்று பெரிய பொருளாதார நாடுகளில் ஒன்றாக இடம்பெறுவதற்கு இந்தியா வேகமாக முன்னேறி வருகிறது. இந்த வேகம் எங்கிருந்து கிடைத்தது? சீர்திருத்தம், செயல்பாடு மற்றும் மாற்றத்துக்கான முனைப்பின் மூலம் வேகம் கிடைக்கிறது. அதேபோல தெளிவான நோக்கம், நேர்மையான முயற்சிகளின் வழியாக நமக்கு வேகம் கிடைத்துள்ளது.